Mjalti ka mjaft vlera nga të cilat një organizëm mund të përfitojë vitaminat, mineralet, probiotikët, aminoacidet, enzimat dhe shpesh mund ta gjeni si përbërës tek kurat natyrale. E kjo jo më kot! Për shekuj me rradhë përfitimet e tij janë njohur në të gjithë botën.
E megjithatë, duke qenë se përmban sheqer, shpesh rekomandohet të mos konsumohet nga ata individë që duhet të shmangin sheqerin. Por a është kjo këshillë gjithmonë e saktë?
AgroWeb.org ju njeh më poshtë me rezultatet e studimit më të ri nga Universiteti i Torontos në Kanada.
Çfarë zbulon studimi rreth përfitmeve nga konsumi i mjaltit?
Në një studim të ri nga Universiteti i Torontos, rezultoi se konsumi i mjaltit mund t’i ndihmojë njerëzit të menaxhojnë nivelet e larta të kolesterolit ose sheqerit në gjak.
Studiuesit thanë se përfitimet shëndetësore të mjaltit janë aq të fuqishme saqë statusi i tij si një produkt me sheqer ndoshta duhet të rishikohet.
Në mënyrë të veçantë, studiuesit zbuluan se konsumi i mjaltit lidhet me uljen e glukozës në gjak tak diabetikët.
Studimi tregoi gjithashtu se ai përmirësoi shëndetin e zemrës, duke ulur nivelet e larta të kolesterolit dhe të triglicerideve.
Përfitimet e mjaltit ishin shumë të dukshme kur mjalti vinte nga një burim i vetëm lulesh, veçanërisht tërfili.
Përfitimet ishin edhe më të dukshme për mjaltin e papërpunuar, krahasuar me mjaltin e përpunuar.
Sipas studiuesëve nëse jeni duke përdorur sheqer në tryezë, shurup ose ëmbëlsues tjetër, ndërrimi i tyre me mjaltë mund të ulë rrezikun e këtyre sëmundjeve. Por nëse jeni duke ndjekur një regjim të rreptë pa sheqerna atëhere ndiqeni atë sipas këshillave të mjekut tuaj. /AgroWeb/
