Nëse krahasohen të dhënat mbi konsumin vjetor të mjaltit dhe patateve të skuqura (çipsi) nga qytetarët në RMV sot me ato të së kaluarës, vihet re se sasitë e mjaltit variojnë nga 1.6 deri në 3.6 kilogramë, ndërsa konsumi i patateve të skuqura (çipsi) është rritur tri deri në katër herë, shkruan Faktor, përcjell Nistori.
Ekspertët thonë se, kur bëhet fjalë për ushqimin, njerëzit duhet të jenë të matur dhe të konsumojnë atë që ua lejon gjendja shëndetësore.
“Në varësi të kategorisë së njerëzve për të cilët flasim, disa mund të hanë mjaltë, disa jo. Varet nga gjendja shëndetësore. Për fëmijët, ne e rekomandojmë patjetër, ndërsa për njerëzit me diabet dhe rezistencë ndaj insulinës, ata mund të hanë mjaltë nëse ai kombinohet mirë me ushqime të tjera, nëse ka fibra dietike, yndyrna dhe proteina, për të ngadalësuar thithjen e sheqerit. Patatet e skuqura mund të konsumohen herë pas here; nuk duhet të jemi ‘skllevër’, por gjithsesi të zgjedhim opsione më të shëndetshme. Nëse konsumohen me ushqime të tjera siç duhet, nuk ka problem të lejohet konsumimi i herëpashershëm i picës, por kjo duhet të bëhet me vetëdije dhe duke qenë të kujdesshëm. Nëse bëhet fjalë për një person me problem shëndetësor, sigurisht që duhet të ketë kujdes me ushqimin”, thotë nutricionistja Emilija Blazheska Angelovska.
Vanço Kirovski, bletar nga Koçani, është i mendimit se njerëzit në vendin tonë nuk janë mjaftueshëm të informuar për mjaltin. Sipas tij, ka familje që e konsumojnë rregullisht, por edhe të tjera që nuk e praktikojnë konsumimin e mjaltit.
“Mendoj se kategoria e njerëzve që hanë mjaltë ka mbetur e pandryshuar. Nëse ata do të konsumojnë mjaltë varet nga zakonet dhe edukimi në familje”, tha Kirovski.
Në vitin 2024, familjet në RMV konsumuan mesatarisht 2.5 kilogramë mjaltë. Në vitin 2023, mesatarja ishte 1.6 kilogramë, ndërsa në vitin 2022 ishte 2.7 kilogramë për familje. Në vitin 2021, sipas të dhënave të Entit Shtetëror të Statistikave (EShS), familjet konsumuan mesatarisht 3.6 kilogramë mjaltë; në vitin 2020, 2.9 kilogramë; në vitin 2019, 2.6 kilogramë. Në vitin 2018, familjet konsumuan 2.4 kilogramë mjaltë, ndërsa në vitin 2017 sasia ishte më e ulët, 2.3 kilogramë. Për krahasim, në vitin 2005, konsumi i mjaltit për familje ishte 2.2 kilogramë.
Nëse shihen statistikat për patatinat, në vitin 2024 familjet konsumuan mesatarisht 1.8 kilogramë. Në vitin 2023, sasia ishte 1.6 kilogramë, njësoj si në vitin 2022. Në vitin 2021, familjet maqedonase konsumuan mesatarisht 2 kilogramë patatina. Në vitin 2020, mesatarja ishte 1.8 kilogramë; në vitin 2019, 1.6 kilogramë; në vitin 2018, 1.4 kilogramë; ndërsa në vitin 2017 familjet konsumuan mesatarisht 1.1 kilogramë patatina. Për krahasim, në vitin 2004 familjet maqedonase konsumuan vetëm 600 gramë patatina, ndërsa në vitin 2003 vetëm 500 gramë. /Nistori/
