Duhet të përgatitemi për një vit të vështirë, pasi kriza në Lindjen e Mesme do të zgjasë më shumë dhe pasojat e saj do të jenë më të theksuara, deklaroi kryeministri Hristijan Mickoski, duke njoftuar masat e reja të qeverisë për uljen e akcizës, përcjell Nistori.
Ai theksoi se kjo situatë do të ndikojë në buxhetin, nga i cili financohen masat, dhe paralajmëroi ribalancimin e tij në qershor. Sipas tij, pasojat e para të krizës do të reflektohen në rritjen e inflacionit.
“Masat e fuqishme janë hapi i parë që po ndërmarrim. Presim që ato të ndikojnë në kontrollin e inflacionit. Vlerësoj se inflacioni në mars do të jetë rreth gjysma e atij të marsit të kaluar, pra midis 4 dhe 5 për qind. Besojmë se këta hapa të parë po japin efekt. Ministria e Financave po analizon mundësinë që produktet bazë ushqimore me TVSH 5% të ulen në 0%, por kjo është shumë më pak në krahasim me masat më të mëdha që po ndërmarrim”, tha Mickoski.
Ai shtoi se pritjet janë që kriza të ketë efekt të zgjatur.
“Duhet të përgatitemi për një vit të vështirë. Megjithatë, ne do të vazhdojmë të monitorojmë situatën dhe të reagojmë sipas prioriteteve. Kjo periudhë duhet të përballohet, e jo të fokusohemi te të ardhurat apo fitimet. Po përgatitemi për një fazë më të gjatë dhe më të vështirë. Edhe para kësaj krize, kishim planifikuar ribalancimin e buxhetit në fund të qershorit. Analizat fillestare tashmë janë duke u bërë; pres që dokumenti të jetë gati në maj, të kalojë në procedurë qeveritare dhe më pas të dërgohet në Kuvend në qershor, në mënyrë që buxheti i ribalancuar të hyjë në fuqi në korrik”, shpjegoi ai.
Mickoski bëri të ditur se, pavarësisht rritjes së konsumit të karburanteve nga 10 në 15 për qind, vendi ka sasi të mjaftueshme të derivateve të naftës.
“Aktualisht nuk ka asnjë indikacion për kufizime në sasi, siç kanë ndërmarrë disa vende të BE-së. Përkundrazi, një numër i madh qytetarësh nga vendet fqinje furnizohen me karburant në vendin tonë. Konsumi është rritur: në fillim ishte 10 për qind, ndërsa tani ka arritur në 15 për qind”, tha ai.
Ai shtoi se për momentin nuk ka nevojë të zbatohen masa kursimi sipas modelit të disa vendeve të BE-së, pasi furnizimi me karburante është i qëndrueshëm.
Sipas tij, nga e hëna pritet që çmimi i benzinës të jetë nga 1.32 deri në 1.37 euro për litër, ndërsa i naftës nga 1.50 deri në 1.53 euro për litër. Në gazsjellësin Selanik–Shkup, shtoi ai, ka rezerva për rreth 60 ditë, si dhe edhe 62 ditë shtesë në rezervat shtetërore.
“Për momentin nuk shohim rrezik në aspektin e furnizimit, që është prioriteti kryesor. Prioriteti i dytë është ruajtja e stabilitetit të çmimeve, në mënyrë që të shmanget inflacioni dyshifror. Deri tani, qasja jonë ka dhënë rezultate dhe do të vazhdojmë të ndjekim zhvillimet për të marrë vendime të mëtejshme”, përfundoi Mickoski. /Nistori/
