Zyrtarët policorë nga Zyra e Jashtme për Çështje Kriminale – Gostivar ndaluan një 29-vjeçar me inicialet T.B. nga fshati Zdunjë i Gostivarit, nën dyshimin për një krim të rëndë që përfshin dhunë seksuale dhe shantazh ndaj një të miture. Siç njoftoi Sektori për Punë të Brendshme – Tetovë, rasti u raportua dje nga një 42-vjeçar nga Gostivari, përcjell Nistori.
Ai raportoi në stacionin policor se disa muaj më parë, në zonën e qytetit, një person i panjohur mashkull, i cili drejtonte një automjet të tipit “Volkswagen Jeep” me ngjyrë të zezë, kishte ndaluar vajzën e tij të mitur. Zëdhënësi i SPB Tetovë, Fatmir Rexhepi, sqaroi se sipas pretendimeve në kallëzim, autori e kishte përdhunuar vajzën duke ushtruar forcë fizike, ndërsa kishte bërë edhe kërcënime serioze për jetën e saj dhe të familjes së saj.
“Autori e ka ndaluar vajzën e mitur të ankuesit dhe, duke përdorur forcë fizike, e ka përdhunuar atë, duke kërcënuar jetën e saj dhe të familjes së saj”, tha zëdhënësi i SPB Tetovë.
Më 22 prill 2026, në rrjetet sociale u publikuan fotografi dhe video eksplicite të viktimës së mitur, dhe menjëherë pas marrjes së njoftimit, policia ndërmori masa operative dhe e identifikoi shpejt të dyshuarin.
U kryen kontrolle në dy lokacione: në shtëpinë e tij në fshatin Zdunjë, si dhe në një objekt tjetër në fshatin Raven, ku ndodhej i arrestuari. Gjatë kontrolleve u sekuestruan një laptop, një telefon celular, një USB memorie dhe sende të tjera që do t’i nënshtrohen ekspertizës dhe do të shërbejnë si prova në hetim.
I dyshuari T.B. aktualisht po mbahet në stacion policor për procedura të mëtejshme, pas së cilave do të ngrihet kallëzimi penal përkatës në prokurorinë kompetente. /Nistori/
