Familjarët e personave të vdekur dhe të mbijetuarit e aksidentit të autobusit në Bullgari kërkuan hetim paralel për të përcaktuar shkaqet e tragjedisë që tronditi rajonin. Hetuesit nga Perniku nga nesër do ta kontrollojnë sërish vendin, do të analizojnë rrugën, tabelat, kthesat dhe si ka qenë mirëmbajtja e rrugës.
Sipas avokatit që përfaqëson të dëmtuarit, pjesa fatale e autostradës së Strumës ku ndodhi aksidenti tani duket ndryshe. Ndërkohë, ai tha se agjencia rrugore ka bërë disa ndryshime sa i përket shënjimeve. Siç thotë ai, do të kontrollohet jo vetëm vendndodhja por edhe disa kilometra para dhe pas për të marrë pamjen reale të gjendjes së rrugës.
Familjet e të lënduarve thonë se fajin nuk mund ta ketë vetëm shoferi i autobusit të Besa Trans, ndërsa përgjegjësi kërkojnë edhe nga Agjencia për Infrastrukturë Rrugore, përcjell Nistori.
Avokati beson se e gjithë kjo do të tregojë saktësisht se çfarë ka munguar më parë në këtë pjesë rrugore dhe nëse ato mangësi kanë qenë shkaku kryesor i aksidentit.
Familjet po ngrenë gjithashtu pikëpyetje se çfarë ka ndodhur me sendet personale të të vdekurve, pasi ata pretendojnë se pasagjerët mbanin bizhuteri floriri me vlerë, të cilat as nuk u ishin regjistruar dhe as nuk iu dorëzuan atyre.
Nga hetimi i dhjetorit rezultoi se shkaku kryesor i fatkeqësisë ishte shpejtësia që nuk ka qenë e përshtatur me kushtet e rrugës.
Hetimi paraprak në prokurorinë e RMV-së, i cili duhet të përcaktojë se si autobusi Besa Trans ka arritur të kalojë kufirin shtetëror mbi 120 herë me dokumente të falsifikuara, ka muaj që po vazhdon./Nistori/