Sonte, në orën 19:00, në teatrin e Tetovës premiera e komedisë “Njeriu që pa vdekjen me sy”, një vepër e autorit të njohur Viktor Eftimiu, nën regjinë e Elmir Sejfullait, përcjell Nistori.
Shfaqja sjell në skenë një përplasje të fortë njerëzore dhe filozofike mes dy botëve — asaj të pasurisë dhe të mjerimit. Një zotni i pasur, i zhgënjyer nga jeta dhe i etur për kuptimin e saj, shpëton një vagabond nga vetëvrasja. Ajo që nis si një akt mëshire, shndërrohet në një duel të mprehtë fjalësh dhe ideologjish, ku ironia dhe dramatizmi zbulojnë absurditetin e ekzistencës.
Në skenë do të interpretojnë Driton Lazami, Besian Sulejmani, Arian Ejupi, Kujtime Ahmeti, Afrodita Xhaferi dhe Besnik Rushiti. Për skenografinë është kujdesur Enes Deari, ndërsa kostumet mbajnë firmën e Emira Ymerit.
Drama komike e Eftimiut mbetet një reflektim i thellë mbi jetën, vdekjen dhe kufijtë e lirisë njerëzore – një thirrje për të parë përtej iluzioneve të përditshmërisë dhe për të pyetur veten: çfarë do të thotë të jesh vërtet gjallë. /Nistori/
