Në urimet e tyre, partitë politike dhe përfaqësuesit e pushtetit dhe opozitës përcollën një mesazh të përbashkët: kjo ditë është një rast për të kujtuar vendimin historik të qytetarëve në vitin 1991, por edhe për të reflektuar mbi të ardhmen e shtetit, nevojën për institucione më të forta, barazi, sundim të ligjit dhe krijimin e kushteve që të rinjtë ta ndërtojnë të ardhmen e tyre në Maqedoninë e Veriut, përcjell Nistori.
Partitë politike dhe përfaqësuesit e pushtetit dhe opozitës u dërguan sot urime qytetarëve me rastin e 8 Shtatorit – Ditës së Pavarësisë dhe 35-vjetorit të referendumit, në të cilin u mor vendimi për një shtet të pavarur dhe sovran.
Njëkohësisht, ata përcollën mesazhe për ndërtimin e përbashkët të së ardhmes dhe krijimin e një shteti më të begatë për brezat e ardhshëm.
VMRO-DPMNE-ja në pushtet tha se pavarësia është përgjegjësi e përbashkët dhe trashëgimi për brezat e ardhshëm, duke kujtuar se 35 vjet më parë qytetarët u bashkuan rreth ëndrrës për një Maqedoni të lirë dhe të pavarur.
“Pavarësia është ndjenjë përkatësie, dashuri për atdheun dhe përgjegjësi për të ardhmen. Është një detyrim për të ruajtur atë që na ka mbetur dhe për t’ua kaluar brezave të ardhshëm me dinjitet”, thuhet në urimin e partisë.
Për VLEN-in, parti në pushtet, 8 Shtatori është një ditë që u përket të gjithë qytetarëve, pavarësisht përkatësisë etnike, gjuhës, fesë apo bindjeve politike.
Në deklaratën e partisë me rastin e festës thuhet gjithashtu se shteti ndërtohet me kontribut të përbashkët dhe se në periudhën e ardhshme është e nevojshme të vazhdohet me ndërtimin e një shteti funksional, demokratik dhe të zhvilluar ekonomikisht, në të cilin barazia, drejtësia dhe sundimi i ligjit do të jenë vlera të përditshme.
“Rruga evropiane e Maqedonisë së Veriut nuk ka alternativë. Integrimi në Bashkimin Evropian do të thotë standarde më të larta, më shumë mundësi për qytetarët, institucione më të forta dhe një të ardhme më të sigurt për brezat e rinj”, thuhet në urimin e VLEN-it.
Lëvizja ZNAM për Maqedoninë Tonë gjithashtu përcolli një mesazh urimi, duke theksuar se pavarësia është nder, por edhe detyrim për të ruajtur shtetësinë, për të mbrojtur dinjitetin dhe për të krijuar një Maqedoni në të cilën çdo qytetar do të ketë një të ardhme të sigurt dhe mundësi të barabarta.
Nga ZNAM-i thonë se Maqedonia është atdhe i përbashkët, pavarësia është trashëgimi, ndërsa e ardhmja është detyrim i përbashkët. Partia bëri thirrje për ndërtimin e përbashkët të një shteti të fortë, të qëndrueshëm, dinjitoz dhe evropian.
Aleanca Demokratike, në mesazhin e saj të urimit, kujtoi rrethanat komplekse në të cilat u zhvillua procesi i pavarësimit të vendit, si dhe sfidat dhe bllokadat e shumta me të cilat është përballur Maqedonia gjatë tri dekadave e gjysmë të fundit.
Partia bëri thirrje për unitet dhe bashkim rreth interesave më të rëndësishme shtetërore dhe kombëtare, me qëllim ndërtimin e përbashkët të një shteti modern, demokratik dhe evropian.
“Është mirë që sot, pavarësisht dallimeve politike dhe të tjera, të gjithë jemi krenarë, të bashkuar dhe festojmë Ditën e Pavarësisë. Ajo ditë është simbol i luftës shekullore për liri dhe shtetësi dhe përfaqëson vazhdimësinë e idealeve të luftëtarëve të Ilindenit, partizanëve dhe të gjithë bashkëkohësve që kontribuuan në ruajtjen dhe afirmimin e identitetit, shtetësisë dhe dinjitetit maqedonas”, thuhet në mesazhin e urimit.
Kryetarja e Partisë Liberal-Demokratike (LDP), Monika Zajkova, në mesazhin e saj me rastin e Ditës së Pavarësisë, tha se pas 35 vjetësh është koha për një ndryshim rrënjësor të sistemit dhe për përgjegjësi më të madhe nga institucionet dhe zyrtarët.
Ajo vlerësoi se partitë politike në pushtet ndryshojnë, por sistemi dhe praktikat mbeten të njëjta, duke theksuar se Maqedonisë nuk i nevojitet vetëm ndryshimi i qeverisë, por një ndryshim i vërtetë në mënyrën se si funksionon shteti.
“Shteti para partisë. Institucionet para funksioneve. Përgjegjësia para justifikimeve”, tha Zajkova, duke paralajmëruar se të rinjtë do të vazhdojnë ta kërkojnë të ardhmen e tyre jashtë vendit nëse nuk ndërmerren ndryshime thelbësore.
Urim me rastin e 8 Shtatorit përcolli edhe ministri i Vetëqeverisjes Lokale, Ivan Stoilkovic, i cili tha se 35 vjetët e pavarësisë përbëjnë një periudhë të mbushur me sfida, arritje dhe përvoja që i kanë hapur rrugën shtetit.
Sipas tij, është përgjegjësi e brezave të sotëm ta ruajnë dhe ta zhvillojnë atë që është krijuar, si dhe të ndërtojnë një shtet me institucione të forta, komunitete lokale të zhvilluara, mundësi të barabarta dhe zhvillim të ekuilibruar.
Ministri i Drejtësisë, Jeton Shasivari, në mesazhin e tij të urimit theksoi se pavarësia është një arritje historike, por edhe një detyrim për ta ndërtuar dhe forcuar shtetin çdo ditë.
Sipas tij, shtet i fortë është ai në të cilin ligji zbatohet në mënyrë të barabartë për të gjithë, drejtësia është e pavarur, ndërsa institucionet janë profesionale dhe të besueshme.
Ai gjithashtu theksoi se rruga drejt Bashkimit Evropian kalon përmes sundimit të ligjit, reformave të qëndrueshme dhe respektimit të të drejtave të njeriut.
Ndërkohë, ministri i Administratës Publike, Goran Minçev, tha se pavarësia është përgjegjësi ndaj shtetit, qytetarëve dhe brezave të ardhshëm.
“Le ta ruajmë atë me krenari, ta ndërtojmë me dashuri dhe përgjegjësi dhe të lëmë pas një vend në të cilin brezat e ardhshëm do të duan të qëndrojnë, të jetojnë dhe të ndërtojnë ëndrrat e tyre”, tha Minçev. /Nistori/
