Disa nga drejtoritë e shkollave fillore dhe të mesme në vend kanë frikë se si do ta kalojnë dimrin për shkak të rritjes së faturave të energjisë elektrike. Çmimet e naftës për ngrohje janë gjithashtu të larta. Alternativa që shkollat nuk do të donin ta shihnin që tani është transferimi i mësimit online.
“Në asnjë rast nuk duhet të mbyllen shkollat gjatë muajve të ftohtë dhe të refuzohet ideja e mësimdhënies online sepse me situatën e Covid-it rezultatet nga mësimi online kanë qenë zhgënjyese”, tha Jordan Puroski – drejtor i SH.F “Shën Klementi i Ohrit”.
Ministri i Arsimit gjatë vizitës së sotme në shkollat në Strugë tha se ka kërkuar nga drejtuesit që të kursejnë energjinë elektrike. Mirëpo, sipas tij, nuk shqyrtohet mundësia e fillimit të pushimeve dimërore më herët apo mësimit online gjatë asaj periudhe.
“Unë jam i mendimit që duhet të ketë edukim të plotë fizik. Në takimet me institucionet do të flasim që arsimi të jetë prioritet si dhe shëndetësia dhe sektorët tjerë. Ne do ta diskutojmë këtë problem që ta menaxhojmë në mënyrën më të mirë. Ministria e Arsimit dhe Kulturës ka nxjerrë të gjitha të dhënat për të gjitha shkollat fillore dhe të mesme se sa e përdorin energjinë elektrike dhe në komunikim me drejtorët do të kërkojmë një mënyrë më të mirë për menaxhimin e energjisë elektrike”, tha Jeton Shaqiri – Ministër i Arsimit.
Ndryshe, shkollat mesatarisht, në varësi të madhësisë, shpenzojnë disa mijëra euro për ngrohje në sezon, plus faturat e energjisë elektrike./ Alsat/
