Një kompani spanjolle ka krijuar një sistem për të nxjerrë ujë të pijshëm nga ajri i hollë për të furnizuar rajonet e thata ku njerëzit janë në nevojë. Enrique Veiga, një inxhinier 82-vjeçar spanjoll, është shpikësi i kësaj makinerie që mund të nxjerrë ujë të pijshëm nga atmosfera, madje edhe në shkretëtirë.
“Qëllimi është të ndihmojmë njerëzit,” tha Enrique Veiga, inxhinieri 82-vjeçar i cili shpiku makinën gjatë një thatësire të ashpër në Spanjën jugore në vitet 1990. “Qëllimi është të arrijmë në vende si kampet e refugjatëve që nuk kanë ujë të pijshëm.
Aparati i tij ka nisur që të përdoret në disa zona rurale të Namibisë dhe në një kamp refugjatësh libanezë.
“Në fshatrat që vizituam në Namibi, ata u mahnitën, nuk e kuptuan, duke pyetur se nga vinte uji,” tha ai.
Makinat përdorin energjinë elektrike për të ftohur ajrin derisa të kondensohet në ujë, duke shfrytëzuar të njëjtin efekt që shkakton kondensim në njësitë e kondicionimit.
Ndërsa gjeneratorët e tjerë të ujit të bazuar në teknologji të ngjashme kërkojnë lagështi të lartë të ambientit dhe temperatura të ulëta për të funksionuar në mënyrë efektive, makinat e Veiga punojnë në temperatura deri në 40 Celsius (104F) dhe mund të përballojnë lagështinë midis 10% dhe 15%.
Një makinë e vogël mund të prodhojë 50-75 litra në ditë, dhe të bartet lehtësisht në një karrocë, por versionet më të mëdha mund të prodhojnë deri në 5.000 litra në ditë.
“Ideja jonë nuk është vetëm të bëjmë një pajisje efektive, por gjithashtu ta bëjmë atë të dobishme për njerëzit që duhet të ecin me kilometra për të marrë ujë ose për të bërë puse,” shpjegoi Veiga.
Refugjati vietnamez me bazë në Zvicër, Nhat Vuong iu bashkua kauzës pasi takoi Veigën dhe vizitoi një kamp refugjatësh pranë Tripolit në Liban në 2017.
Ai themeloi një organizatë jofitimprurëse, Water Inception, e cila solli 500 litra në ditë në kamp.
“Po funksionon bukur, jam vërtet i lumtur,” tha Nhat, i cili tani po mbledh fonde për të instaluar panele diellore për të ulur kostot e energjisë elektrike dhe për të zvogëluar ndikimin mjedisor të projektit.
