Alternativa, pas mbledhjes së Kuvendit Qendror në Tetovë morën vendim për dalje nga Qeveria, kjo për shkak se kryeministri Dimitar Kovaçevski ka vendosur ta përfshijë në partneritet qeverisës Aleancën për Shqiptarët. Rrjedhimisht, ministritë dhe zv.ministritë që ka udhëhequr Alternativa për një vit, do t’i takonë ASh-së. Sipas Afrim Gashit, partneritetët e deritanishëm qeverisës kanë shkelur vijën e fundit etike dhe nuk patën durim ta presin as vendimin e Kuvendit Qendror të AAA, raporton Nistori.
“Kjo flet shumë për moralin e tyre politik, megjithatë ne sot u takuam që ta marrim vendimin tonë përfundimtar përkitazi me rrethanat e reja të krijuara. Ashtu siç e di opinioni, në janarin e vitit 2022 Maqedonia e Veriut ishte para një sfidë hamletiane në rrugën e saj drejt Bashkimit Europian. Madje, rruga e saj e nënkuptonte edhe rrugën e Shqipërisë. Në atë kohë, kur gjendja ishte e tillë, në morëm vendimin më të guximshëm, që na bën krenarë edhe sot dhe që besoj se vlerësohet jo vetëm nga strukturat e nga votuesit tanë, si dhe nga qytetarët tanë, por edhe nga bashkëkombësit tanë shqiptarë, si dhe nga aleatët tanë perëndimorë. Duke e krijuar një shumicë që atëbotë nuk ekzistonte, ne në janar 2022 mundësuam stabilizimin e qeverisë e të shtetit, ndërsa në korrik 2022 edhe zyrtarisht u hapën negociatat për Bashkimin Europian dhe kështu përfundoi tranzicioni tridekadësh në vendet tona. Meqë vendimi ynë ishte politik, ne me kryetarin e atëhershëm të LSDM-së nënshkruam dhe publikuam një marrëveshje politike dhe një tjetër kadrovike, kjo e dyta si garanci e implementimit të marrëveshjes politike, e cila ishte miratuar edhe nga kryeministri aktual. Dhe, ndonëse pikat e asaj marrëveshjeje u zbatuan nga ana jonë, megjithatë, për fat të keq, pala tjetër nuk e implementoi as marrëveshjen politike e as atë kadrovike plotësisht, ndërsa në fund ata – në mënyrë të njëanshme, gati brutale – e thyen marrëveshjen dhe vendosën që ta ndajnë rrugën me ne, duke e përfshirë në shumicën parlamentare një parti tjetër. Kjo flet shumë, fatkeqësisht flet keq, për ata dhe jo vetëm për ata si parti, si subjekt që nuk i bëhet vonë që i thyen marrëveshjet dhe nuk i respekton ata që ia kanë shpëtuar jetën, por kjo flet shumë keq edhe për një vend që synon vlera europiane. Nëse LSDM-ja gjykon se standardet europiane janë nëpërkëmbja e marrëveshjeve, ky është lajm shumë i keq për Maqedoninë e Veriut.” – deklaroi Gashi.
“Pas një viti qeverisje ne kemi lënë pas vetes dhjetëra projekte të suksesshme në shëndetësi, kemi lënë pas vete projekte të suksesshme të digjitalizimit, të energjetikës, të çështjeve sociale, kulturore e arsimore dhe, pos kësaj, sot jemi këtu për t’ju thënë se krejt kjo ka ndodhur pa asnjë aferë për korrupsion. Madje, kur jemi të lufta kundër korrupsionit. AlternAtivA është partia e parë dhe e vetme që ka propozuar amendament kushtetues për luftën kundër korrupsionit dhe ky është bërë kryeidentiteti ynë politik. Për gjithë këtë punë të qeverisjes, dua ta falënderoj secilin funksionar veç e veç, që ka lënë gjurmë suksesi në shërbimin e tij ndaj qytetarëve duke mos bërë dallime etnike, politike, religjioze a gjinore. Pavarësisht kësaj, pasi që në anën tjetër kemi parti që nuk e mbajnë premtimin, që nuk e dinë se çka janë vlerat europiane dhe, madje, as në kuptimin etik nuk janë të denjë për partneritet, ne sot kemi vendosur që AlternAtivA – bashkë me tre deputetët dhe të gjitha strukturat tona – sot e tutje do të jetë parti opozitare Megjithatë, ne mbetemi të përkushtuar në rrugën europiane, të përcaktimeve tona ideologjike, të programit tonë politik dhe të virtyteve në të cilat ne besojmë. Do të vazhdojmë të angazhohemi për të mirën e qytetarëve, për t’i mbajtur të rinjtë këtu, për të krijuar standard më të mirë jetësor dhe për luftë kundër korrupsionit.” – shtoi Gashi.
Gashi tha se AAA do ta mbështesë secilën agjendë në interes të qytetarëve dhe do të jenë të pakompromistë në luftën e secilës dukuri që është në dëm të qytetarëve. /Nistori/
