Bashkimi Evropian është “gati për një luftë tregtare” me SHBA-në dhe ka në plan të “sulmojë shërbimet online” në përgjigje të tarifave të reja nga administrata e presidentit amerikan Donald Trump, ka njoftuar një zëdhënëse e qeverisë franceze.
“Ne jemi mjaft të sigurt se me të vërtetë do të dëshmojmë një ndikim negativ në prodhim”, tha Sophie Primas, duke shprehur shqetësim të veçantë për ndikimin e fortë në prodhimin e verës dhe pijeve alkoolike.
“Ne kemi gamën e plotë të mjeteve dhe jemi gati për këtë luftë tregtare dhe pastaj do të shohim se si mund ta mbështesim prodhimin tonë industrial”, theksoi zëdhënësja.
Primas tha se Trump beson se ai është “mjeshtër i botës” dhe se qasja e tij është “një qëndrim imperialist që e kemi harruar disi”, por që po kthehet, shkruajnë mediat e huaja, përcjell Telegrafi.
Ndryshe, Trump shpalli “Ditën e Çlirimit”, kur njoftoi tarifa të larta pothuajse në të gjithë botën, duke përfshirë 20% për importet nga Bashkimi Evropian.
Ndërkohë, Primas tha se BE po përgatit një përgjigje me dy hapa.
E para, një “përgjigje fillestare”, do të miratohet në mes të prillit dhe do të ketë të bëjë me aluminin dhe çelikun, dhe BE-ja më pas do të synojë “të gjitha produktet dhe shërbimet” nga SHBA.
Këto masa duhet të jenë gati deri në fund të prillit dhe aktualisht janë duke u diskutuar.
“Ne gjithashtu do të sulmojmë shërbimet. Për shembull, shërbimet online që aktualisht nuk tatohen”, vazhdoi zëdhënësja franceze.
Raportohet se BE-ja gjithashtu mund të përgjigjet me një ndalim të “aksesit në kontratat e prokurimit publik”.
Zyra e presidentit francez Emmanuel Macron njoftoi se presidenti do të bisedojë pasdite me përfaqësuesit e sektorëve francezë “të prekur nga tarifat” e Shtëpisë së Bardhë.
