Besiana Mehmedi, profesoreshë në fakultetin e arteve, drejtimi muzikor në Universitetin e Tetovës i hedh poshtë denoncimet e studentëve në lidhje me atë se i ka kërcënuar. Mehmedi thotë se nuk do të ndodh as në ëndërr që ajo të dorëzohet para shtantazheve, njofton Nistori.
“Për të gjithë ata që nuk e dinë se si ka ndodhur kjo ngjarje, kanë mjaftuar shpifjet nëpër media, të cilat janë përdorur si “argumente” për të njollosur personalitetin tim prej pedagogeje dhe artisteje. Por, e vërteta është krejt ndryshe dhe jo ashtu siç duan të më prezantojnë ata që përmes baltosjes sime duan t’i fshehin dobësitë e tyre. Megjithatë, ndjej për obligim moral e profesional që para publikut të dashur të jap disa sqarime mbi të vërtetën e asaj çka ka ndodhur në datën e lartpërmendur. Këtë sqarim e jap si detyrim ndaj atyre që më njohin si pedagoge e devotshme dhe si një artiste e përmasave kombëtare, duke hedhur poshtë të gjitha shpifjet dhe baltosjet në adresë timen. Ja e vërteta që s’do të donin ta dëgjojnë autorët dhe insipruesit e fushatës së orkestruar kundër meje: Është praktikë e çdo pedagogu, pra edhe e imja, që para se të fillojë me leksionin e paraparë, të pyes studentët për leksionin paraprak, në mënyrë që të krijohet një interaksion funksional në tërësinë e materies, por edhe si mundësi për të freskuar njohuritë nga orët e kaluara. Kjo praktikë s’kishte si të ishte ndryshe edhe më datë 21 mars 2022. Fillimisht kërkova nga studenti Ardi Lena të thotë se cila ishte tema e fundit, dhe për t’i ndihmuar ia kujtova dy figurat e shquara të muzikës sonë Çesk Zadea e Tish Daia, për të cilët kërkova nga studenti i njejtë të flet shkurtimisht.
Por, në vend të përgjigjes, nga goja e student doli ky “margaritarë”: “Nuk di dhe nuk dua të di dhe ju më pyesni me tendencë, sepse doni të më përziheni se si e përdor Facebook-un privat”. U habita nga lehtësia me të cilën studenti mundohej ta mbulojë mosdijen e tij.
Nuk po diskutoj Facebook-un, por po të them se detyra e studentit është të mësojë dhe jo të injorojë e të përqeshë profesorët e tij. Kjo përgjigje e ime ka mjaftuar që studenti Ardi Lena të del nga kontrolli duke bërtitur me zë të lartë, moment ky që më ka detyruar ta urdhëroj që ta lëshojë klasën.
“Ti do mbash mësim me mure… do ta kalli Fakultetin”, – më thotë studeni në largim e sipër nga klasa, shoqëruar edhe me shprehjet: “dhunuese”, “e poshtër”, “ushtare e Ali Ahmetit”.
Që absurdi të jetë më i madh, tërë këtë skenë e ka incizuar me telefon studenti Bleron Veliu, një argument ky që flet se gjithçka ka qenë e planifikuar dhe e orkestruar, me qëllim të denigrimit tim si pedagoge dhe artiste. Por duke harruar se me këtë veprim të shëmtuar studenti ka bërë shkelje të normave studentore dhe ligjore, ndonëse ky incizim mua më konvenon si prove sepse e gjithë ngjarja ndodhet aty dhe kjo mjafton të dihet e vërteta dhe të demantohen shpifjet në adresë timen.
Rrëmuja e krijuar nga bërtitjet e studentit në fjalë, bëri që situata të acarohet dhe për rrjedhojë ka ardhur edhe shefi i katedrës z. Bajramali Idrizi, i cili e ka pa gjithë këtë situatë të pahijshme të krijuar nga Ardi Lena. Ky i fundit ka vazhduar të bëjë gjeste cinike e të turpshme, por çuditërisht shefi i katedrës i ka lejuar studentët të dalin nga klasa me arsyetimin se qenkan tepër të shqetësuar dhe ndërkohë e thërret në telefon dekanin z. Nafi Jashari, të cilit i tregoi se studenti Ardi Lena ka fyer dhe ka ofenduar profesoreshën dhe kjo ka qenë arsye, sipas tij, që studentët i ka liruar”, thotë Mehmedi ndër të tjera.
Mehmedi ka akuzuar edhe Arif Ziberin e grupit të njohur “Elita 5”, ish-studentin Adis Ismaili, studentët Ardi Lena, Faton Berisha, Rilind Alimani, Erza Shefiti, Gurina Salihun, Inva Abdullahun dhe skenaristët e padukshëm, e cila mendon se është orkestrim ndaj saj për të ulur imazhin.
“Arif Ziberi më ka kërcënuar me jetë“
Arif Ziberi, këngëtar i grupit Elita 5, para dy vitesh ka ardhur në vendin tim të punës-Fakultetin e Muzikës dhe më është kërcënuar fizikisht me jetë për t’ia vënë notën 6 vajzës Elita Ziberi e cila në provimin me shkrim, kishte shkruar emrin, mbiemrin dhe disa lule. Normalisht se unë nuk jap lëndën e vizatimit dhe ato lulet e Elita Ziberit nuk kanë mjaftuar që të më bindin se ajo e njeh lëndën. Por kështu nuk mendon edhe prindi i saj Arif Ziberi, i cili atë ditë kur më kërcënoi më tha edhe këto fjalë: “Vajza ime është Vip dhe këtu ju diplomoni lloj lloj selaku .
Testin e saj të zbrazët me disa lule e kam dëshmi edhe sot.
Arif Ziberi që e ka dhe një vajzë studente, Enisa Ziberin, e cila asnjëherë nuk ka hy në provim e përgatitur dhe këtë e dëshmojnë testet e saj, merr guxim dhe me datë 07.04 2022 hyn sërish në Universitet për të nxitur studentë dhe për të thënë të pavërteta para mediave, pra për të shpifur e për të shfryer inatet personale.
Shkojmë më tutje…. Këtij grupi denigruesish i bashkohet edhe Adis Ismaili, një nga ish-studentët më të dobët në historinë e Fakultetit të Muzikës, i cili gjoja solidarizohet me studentin Ardi Lena në një konferencë shtypi më 07.04.2022 të mbajtur në hapësirat e Universitetit të Tetovës, një veprim ky i pakuptimt për mua për arsye se lejohet që baltosja ime të ndodhë në këtë tempull të dijes, për të cilin të gjithë jemi sakrifikuar nga pak. Të gjithë ata që janë të interesuar të dijnë se çfarë studenti ka qenë Adis Ismaili, le të urdhërojnë të vijnë te zyra ime ku pasi do t’ia jap testet me shkrim të këtij studenti, do të binden se cilat kanë qenë kualitetet e tija.
Por nuk përfundon këtu saga e studentëve që dobësitë e tyre mundohen t’i kamuflojnë duke sulmuar me pa të drejt personalitetin tim. Një nga ata është edhe studenti Rilind Alimani, i cili për tre vite asnjë herë dhe në asnjë ligjëratë nuk ka ardhur. Asnjë herë dhe në asnjë provim nuk ka hy. Tani ai i jep të drejtë vetes të komentojë se si “kërcenon” profesoresha.
Edhe studenti Faton Berisha që ankohet, do duhej të ishte viti i tretë, por asnjëherë nuk ka hyrë në provim. Pastaj studenti Bleron Veliu ka dhënë vetëm provimin e semestrit të parë, ndërkohë që do duhej të ishte viti i tretë- semestri i gjashtë. Erza Shefiti e cila ka marrë vërtetime se paska qenë e sëmurë, të njejtën ditë e kam takuar pas ngjarjes dhe gjendja e saj ishte stabile. Për takimin me të ka dhe dëshmitarë në fakultet. Edhe Erza Shefiti natyrisht ende s’ka dhënë provimet e vitit të parë sepse vazhdimisht ky grup ka paraqitur provimet dhe nuk i janë nënshtruar provimeve e kjo deshmohet nga raportet me shënimin-abstenim.
Ardi Lena bashkë me Gurina Salihun, Inva Abdullahun do duhej të ishin viti i tretë por nuk kanë likuiduar vitin e dytë për arsye të mosardhjes në provime dhe mospërgatitjes së materialit, gjë që dëshmojnë testet e tyre.
Krejt kjo gjurulldi e krijuar nuk ka kuptim, por si duket skenaristët e padukshëm po i (keq)përdorin këta studentë të dobët, për të arritur një qëllim që asnjëherë nuk do ta shohin as në ender: që të më mënjanojnë nga procesi adukativo-arsimor.
Kjo edhe për faktin se ka disa studentë, të cilët paraprakisht kanë patur opinione shumë pozitive për mua, siç është rasti me studentet Erza Shefiti dhe Albana Smajli, por që çuditërisht tani unë në sytë e tyre qenkam një “shtrigë” , ose “profesoresha që i bën për spital”.
Sa i përket grupit inicues për bojkot dhe kërkojnë masa apo përjashtim të profesoreshës, Mehmedi thotë se asnjë nga këta studentë që e quajnë veten viti i tretë, realisht nuk janë në të njëjtin grup.
Disa prej tyre madje nuk e kanë likuiduar as vitin e parë e as të dytin dhe sipas normave akademike nuk kanë të drejtë të ndjekin ligjëratat e vitit të tretë të cilat ata po i bojkotojnë. Para se t’i kërkojnë të drejtat e tyre, studentët është mirë t’i kryejnë obligimet e tyre bazike që lidhen drejtpërdrejt me statusin e tyre si student.
Skenaristët e padukshëm është mirë të mos merren me këta studentë të dobët, duke i mbrojtur gjoja ata, e duke hedhur gurë e dru mbi mua. Kjo nuk është etike, por as njerëzore,
Mehmedi për në fund thotë se, dinjitetin njerëzor dhe profesional do ta mbrojë edhe në rrugë ligjore. Ajo këshill për median që mos t’u jepen hapësirë atyre që duan të kryejnë studimet me duar në xhepa, sepse kjo do të na hakmirret si shoqëri dhe si komb.
“Ju lutem të zbatoni një rregull elementar të gazetarisë që kërkon ballafaqim faktesh, përmes akterëve me pozicione të ndryshme në skenën e ngjarjeve. Nëse vazhdohet me këtë paraqitje të njëanshme të ngjarjeve, atëherë rezulton që, bashkëpjesëmarrës në denigrimin tim, ndoshta edhe të pavetëdijshëm, janë edhe segmente të caktuara të sferës publike.”, shton profesoresha.
Ndryshe, studentët e Fakultetit të Arteve – drejtimi Muzikor në Universitetin e Tetovës, akuzojnë profesoreshën Besiana Mehmedi për sjellje jo etike dhe kërcënime, për shkak të statuseve dhe pëlqimeve që bëjnë ata nëpër rrjetet sociale. Ato dje nepërmjet një pres konference për media shprehën revoltën ndaj profesoreshës duke thënë se ankesat e tyre që i kanë parashtruar çdoherë kanë hasur në derë të mbyllura.
Nga ana tjetër edhe Forumi për Ndryshime në Arsim (FNA) ka reaguar në lidhje me denoncimet e studentëve (dhe jo vetëm) të Fakultetit të Arteve kundër profesoreshës inordinare Besiana Mehmedi për kërcënime, fyerje, përbuzje dhe bullizëm sistematik ndaj tyre, tash e disa vite. FNA mbështet plotësisht kërkesën e të studentëve, me qëllim që ky rast të merr epilog sa më shpejt. /Nistori/
