Situata ekonomike në të cilën gjendet vendi është problemi më shqetësues për të anketuarit nga Maqedonia. Nëse në Shqipëri njerëzit shqetësohen më shumë për korrupsionin, apo ikjen e trurit.., apo në Kosovë shqetësues është papunësia dhe sistemi arsimor, sipas sondazhit të Këshillit të Bashkëpunimit Rajonal (RCC) për Barometrin e Ballkanit për vitin 2023 mbi 55 për qind e të anketuarve nga Maqedonia janë të mendimit se shqetësimi i tyre më i madh është situata ekonomike e krijuar. Ky perceptim është në rritje vitet e fundit, në krahasim me më parë ku punësimi renditej si një nga problemet më të mëdha.
Sa i takon vendeve të tjera të Ballkanit Perëndimor, shtetasit shqiptarë mendojnë se shteti i tyre është më i korruptuar në krahasim me të gjitha vendet e tjera të BP, 38% e të anketuarve shqiptarë mendojnë se korrupsioni është një problem i rëndësishëm për ekonominë e vendit. Ky perceptim është më i larti në rajon, pasuar nga Maqedonia dhe Bosnjë Hercegovina me nga 26% . Për Malin e Zi dhe Serbinë treguesi është 25%, ndërsa shtetasit e Kosovës kanë perceptimin më të ulët të korrupsionit në BP. Mesatarja e rajonit është 27%. Për të nëntën herë radhazi, Këshilli i Bashkëpunimit Rajonal publikon rezultatet e Barometrit Ballkanik – sondazhi vjetor i realizuar me gjashtë mijë qytetarë nga i gjithë Ballkani Perëndimor, duke dhënë një pasqyrë mbi opinionet e tyre rreth bashkëpunimit rajonal, integrimit në BE, besimit tek institucionet publike dhe media, shqetësimet e tyre më të mëdha, punësimi, ndryshimet klimatike, siguria, jeta digjitale, transporti, sundimi i ligjit, udhëtimet, etj. Në total vërehet se mbështetja për BE vazhdon rënien, me vetëm 59 për qind të të anketuarve që e mbështesin, ose tre për qind më pak se një vit më parë.
Maqedonia e Veriut është e dyta pas Serbisë ku më shumë se gjysma e të anketuarve nuk e mbështesin BE. Ndërsa shqetësuese është edhe emigrimi. Mbi 44 për qind e të anketuarve mendojnë të lënë vendin e tyre, ose pesë për qind më shumë sesa një vit më parë. /koha/
