Pavarësisht përpjekjeve maksimale të ekipit mjekësor, rezultati ishte tragjik, theksoi Ministria e Shëndetësisë këtë pasdite në lidhje me rastin e fëmijës dyvjeçar të lënduar në natën e Vitit të Ri, përcjell Nistori.
Fëmija dyvjeçar u pranua në Qendrën e Urgjencës, dhe për shkak të seriozitetit të gjendjes, ai u trajtua në Klinikën e Neurokirurgjisë, në njësinë e kujdesit intensiv. U intubua, u vendos në ventilim mekanik, iu përshkrua terapi me antibiotikë dhe antiedemë, dhe u monitorua 24 orë, thuhet në deklaratën e sotme.
Siç shtohet, intensiteti i shkatërrimit të indit të trurit nuk lejoi trajtim kirurgjikal.
Pavarësisht përpjekjeve maksimale të ekipit mjekësor, rezultati ishte tragjik, si pasojë e lëndimeve shumë të rënda në tru të shkaktuara nga një trup i jashtëm metalik.
“Shprehim ngushëllimet tona më të thella dhe të sinqerta familjes dhe të dashurve në këto momente jashtëzakonisht të vështira”, thekson Ministria e Shëndetësisë.
Prandaj, ata u bëjnë thirrje të gjithë qytetarëve që të festojnë festat e Vitit të Ri në mënyrë paqësore dhe me dinjitet, pa përdorimin e piroteknikës, fishekzjarrëve dhe veçanërisht pa përdorimin e armëve të zjarrit.
“Pasojat e një sjelljeje të tillë të papërgjegjshme janë serioze dhe, për fat të keq, mund të jenë fatale”, thonë nga Ministria e Shëndetësisë.
