Kryetari i Alternativës, Afrim Gashi ka reaguar ndaj deklaratës së presidentit serb Aleksandar Vuçiq, i cili sonte deklaroi se kryeministri Albin Kurti ka për qëllim ta mundë politikisht BDI-në në zgjedhjet e majit në këtë vend, përcjell Nistori.
“Prej sonte beteja jonë politike është bërë edhe më e qartë. Pyetja e zgjedhjeve të 8 majit do të jetë: “A jeni me Vuçiqin e Serbisë e Ali Ahmetin apo jeni me opozitën e bashkuar shqiptare – Lidhja Europiane për Ndryshim dhe Albin Kurtin?” Më pastër se kaq nuk mund të bëhej. Njësoj edhe më lehtë për të vendosur”, ka shkruar Gashi.
Më herët presidenti i Serbisë, Aleksandar Vuçiq tha se kryeministri i Kosovës Albin Kurti dëshiron të sundojë edhe në Maqedoninë e Veriut. Këtë e tha në një prononcim për mediet serbe ne Nju Jork, duke shtuar se synimi i kryeministrit i Kurtit është që ta mposht BDI-në dhe pas zgjedhjeve parlamentare të jetë pjesë e qeverisë në vend. /Nistori/
