Në hulumtimin e fundit për punën e deputetëve, Instituti për Demokraci vëren përkeqësim të cilësisë së debatit në Kuvend, ku në fokus ishin pikat e rendit të ditës nga fusha e sundimit të ligjit, të drejtave të njeriut dhe demokracisë.
Deputetët e opozitës ishin më aktiv në pjesëmarrjen e debateve, duke marrë pjesë në 76% të diskutimeve të vëzhguara, ndërsa deputetët e pushtetit morën pjesë në 24%.
“Në 11% të diskutimeve të vëzhguara, deputetët përdorën fakte nga hulumtimi, përvoja, dokumente dhe burime të tjera relevante si pjesë e arsyetimit të tyre, duke konfirmuar kështu nivelin e përgjithshëm të ulët të argumentimit”.
“Në këtë periudhë raportuese, në diskutimet e vëzhguara nuk ka pasur ndryshim të qëndrimit në radhët e deputetëve për shkak të argumenteve më të mira të bashkëbiseduesve apo për ndonjë arsye tjetër që është në të njëjtin nivel me periudhën e fundit të vëzhgimit (korrik – dhjetor 2022)”, thonë nga Instituti. /TV21/
