Ish-presidenti i Shqipërisë, Ilir Meta mbështetë VMRO-DPMNE-në në zgjedhjet e RMV, kështu duke shkruar se fitorja e tyre do t’i japë një dimension të ri zhvillimit ekonomik të Maqedonisë së Veriut në të ardhmen nga i cili do të përfitojnë të gjithë qytetarët e saj, përcjell Nistori.
“Të mos harrojmë se vizioni dhe politikat e saj në qeverisje e shndërruan Maqedoninë e Veriut, vendin e 10-të në botë dhe të 5-të në Europë për klimën e biznesit dhe investimet e huaja. Falë vizionit të VMRO-DPMNE, Maqedonia e Veriut shpërtheu për rritjen e bujqësisë dhe blegtorisë duke e nisur me 10 milionë euro financim në vit e duke e çuar në 200 milionë euro. Ekipi i ri i VMRO-DPMNE besoj se ka mësuar mjaftueshëm nga gabimet e bëra në të kaluarën dhe pasojat e nepotizmit, të cilat eklipsuan arritjet e jashtëzakonshme ekonomike dhe sociale”, shkruan Meta.
Sipas Metës, Maqedonia e Veriut do të vazhdojë të ecë e sigurt në rrugën euro-atlantike dhe përsëri shqiptarët do të jenë garancia kyçe për këtë.
Ndryshe, Ilir Meta ka qenë president i Shqipërisë, kryetar i Parlamentit të Shqipërisë dhe ka udhëhequr një kohë të gjatë partinë LSI. /Nistori/
