Kryetari i Komunës, Bilall Kasami, gjatë inagurimit të një pjesë së rrugës për te lagjja e vilave në Kodrën e Diellit foli edhe për ngritjen e kryqit aty. Kasami akuzoi se ata që sulmojnë komunën, nuk duan të shohin investimet që bën Komuna e Tetovës dhe akuzojnë komunën për kompetenca që nuk i takojnë asaj, përcjell Nistori.
“Ata që nuk duan të shohin investimet që bën komuna e Tetovës, ata shohin shkaqe sesi të kritikojnë komunën për gjëra që nuk janë përgjegjësi e komunës.”- u përgjigj Kasami.
Kasami u pyet dy herë nëse do të largohet kryqi i vendosur në Kodrën e Diellit, pasi ai është vendosur në mënyrë ilegale. Kasami vendosi të flasë për asfaltimin e rrugës dhe investimet, por jo edhe më kryqin në Kodrën e Diellit.
Nga ana tjetër ai tha se në pranverë do të legalizohen të gjitha objektet fetare edhe objektet e kultit.
“Në planin urbanistik janë të parapara objektet fetare, kisha dhe xhamia me ç’ka besoj se do të rregullohet edhe çështja që ka të bëjë me legalizimin e këtyre objekteve fetare”, shtoi Kasami.
