Ministri i Bujqësisë, Pylltarisë dhe Ekonomisë së Ujërave, Cvetan Tripunovski, deklaroi se ministria po e monitoron situatën dhe se do të ndërmerren hapa konkretë nëse paraqitet nevoja.
Fermerët në Maqedoninë e Veriut presin një valë të re të rritjes së çmimeve të produkteve bujqësore si pasojë e konflikteve ushtarake në Lindjen e Mesme, rajon nga i cili sigurohen shumica e plehrave artificiale dhe derivateve të naftës.
Presidenti i Federatës Kombëtare të Fermerëve, Stevançe Jordanoski, në Asamblenë Vjetore të sotme, shprehu pritjen që ministria përkatëse të reagojë në kohë dhe të aktivizojë të ashtuquajturin fond të krizës për zbutjen e pasojave.
“Me zhvillimet aktuale në botë dhe konfliktet që askush nuk i dëshiron, janë krijuar turbulenca të mëdha në tregjet e naftës. Shumica e lëndëve të para dhe plehrave vijnë nga ai rajon, prandaj presim rritje të ndjeshme të çmimeve edhe në tregun me pakicë. Shteti, përkatësisht Ministria e Bujqësisë, duhet të ndërmarrë masa në kohë, përfshirë aktivizimin e fondit të krizës për të siguruar furnizimin me lëndë të para dhe plehra”, tha Jordanoski.
Ministri Tripunovski theksoi se situata po ndiqet në baza ditore.
“Sa i përket çmimeve të plehrave dhe derivateve të naftës, si Ministri po e monitorojmë situatën çdo ditë. Do të vlerësojmë drejtimin e lëvizjes së tyre dhe, nëse është e nevojshme, do të propozojmë masa konkrete për përmirësimin e situatës”, deklaroi ai.
Sa i përket blegtorisë, Tripunovski tha se nuk pret probleme në blerjen e ardhshme të qengjave. Sipas tij, thertoret kanë ofruar një çmim prej 260 denarësh për kilogram në vend.
Pritet një rritje e lehtë e çmimit gjatë javës së ardhshme, kur pritet edhe kulmi i kërkesës para festave të Pashkëve.
“Kemi zhvilluar një sërë takimesh me shoqatat e mbarështuesve të deleve dhe përfaqësuesit e thertoreve. Në takimin e fundit u ofrua çmimi prej 260 denarësh për blerjen e qengjit në vend. Ky çmim varet nga kategoria e qengjit. Nuk pres probleme të mëdha. Nëse çmimi ruhet dhe me rritjen e kërkesës javën e ardhshme, mund të ketë një rritje të lehtë. Po e monitorojmë situatën dhe besoj se blegtorët do të jenë të kënaqur”, tha Tripunovski.
Në Asamblenë vjetore, fermerët theksuan gjithashtu problemet kryesore me të cilat përballen: çmimet e ulëta të blerjes, mungesën e fuqisë punëtore, infrastrukturën e dobët dhe ndikimet e ndryshimeve klimatike.
Sipas Jordanoskit, një nga sfidat më të mëdha mbetet migrimi rural, ku rreth gjysma e të rinjve dhe grave largohen nga fshatrat, duke rrezikuar stabilitetin demografik dhe ekonomik të këtyre zonave.
Ai paralajmëroi se pa një brez të ri fermerësh, e ardhmja e sektorit mbetet e pasigurt, duke theksuar nevojën për politika dhe masa konkrete.
“Bujqësia duhet të bëhet një profesion tërheqës për të rinjtë, përmes përmirësimit të kushteve të punës, stimujve financiarë, modernizimit të infrastrukturës dhe programeve arsimore dhe mbështetëse për të rinjtë dhe gratë në zonat rurale”, tha Jordanoski.
Sipas tij, sektorët më kritikë janë bujqësia dhe blegtoria. Ai theksoi se mungesa e barinjve është bërë alarmante, duke shtuar se sot është e vështirë të gjesh një bari edhe me një pagë prej 2 mijë eurosh.
