Shqiptarët e Maqedonisë së Veriut në skenën politike do të kenë edhe një subjekt të ri politik, subjekt i cili do të quhet Lëvizja Demokratike.
Nismëtari i këtij subjekti politik është deputeti tashmë i pavarur i Kuvendit të Maqedonisë së Veriut, Izet Mexhiti. Ai njihet si ish-deputet i Bashkimit Demokratik për Integrim dhe ish-kryetari i Komunës së Çairit për tre mandate.
“LËVIZJA DEMOKRATIKE do të jetë emri i partisë së re politike, të paralajmëruar ditë më parë nga deputeti Izet Mexhiti. Emri është bërë i ditur sot (01.08.2023) pas përfundimit të afatit për dhënien e ideve nga qytetarët përmes platformës online www.lëvizja.mk.”, njoftojnë nga ky subjekt politik.
Ata paralajmërojnë që më 13 gusht do të bëhet promovimi zyrtar i këtij subjekti politik që pritet të udhëhiqet nga Izet Mexhiti.
“Ju ftoj të gjithëve, pa përjashtim, të bëheni pjesë e Lëvizjes Demokratike, pjesë e një fillimi të ri dhe së bashku ta qojmë deri në fund betejën e nisur”, deklaroi Muhamet Ameti, një nga pjesëtarët e LD-së.
Ndryshe, aktivitetet për themelimin e subjektit të ri politik në Maqedoninë e Veriut i filloi Izet Mexhiti në hapësirat e Komunës së Çairit. Aty ai ishte i shoqëruar ndër të tjera edhe nga deputeti Kastriot Rexhepi, deputetja Merita Koxhaxhiku, kryetari i Komunës së Çairit, Visar Ganiu, dhe personalitet tjera.
Mexhiti pas paralajmërimit për themelimin e subjektit politik, ka zhvilluar takim me kryetarin e Lëvizjes Besa, Bilall Kasami, dhe kryetarin e Alternativës, Afrim Gashin. Pas takimit të tre politikanëve, ata bënë të ditur se kanë biseduar për krijimin e një fronti të përbashkët opozitar si një domosdoshmëri në skenën politike shqiptare.
