Kryetari i Komunës së Tetovës Bilall Kasami, me rastin e fillimit të vitit të ri shkollor, sot e ka vizituar shkollën fillore “Naim Frashëri” në Reçicë të Vogël.
Para gazetarëve Kasami deklaroi se kjo shkollë është keqpërdorur politikisht në periudhën e kaluar, shkruan Nistori.
“Jam i informuar që në aspektin e dokumentacionit janë rregulluar disa çështje, mbetet çështja e oborrit të jashtëm dhe sistemimi i nxënësve dhe kuadrit arsimor. Do të përkushtohemi që sa më shpejt, ambientet e kësaj shkolle të shfrytëzohen në maksimum”, tha Kasami.
Ai deklaroi se sot nuk ka shkuar në këtë shkollë për ta promovuar, por për t’i vizituar nxënësit e klasave të para.
“Do të angazhohemi që edhe kjo shkollë edhe shkolla tjera të kenë kushte optimale për procesin edukativo-arsimor. Bashkë me Sektorin e Arsimit bëjmë analizat e nevojshme që në të gjitha shkollat në Tetovë të kemi mësim me një ndërrim. Shohim se sa hapësira na duhen, çfarë investimesh, projektet e nevojshme, që pastaj të shohim edhe mënyrën e financimit dhe realizimit të atyre projekteve”.
“Fatkeqësisht deri tani nuk kemi gjetur analizë të tillë për të parë se çfarë i duhet Tetovës, për të patur mësim me një ndërrim”, deklaroi mes tjerash Kasami.
Në lidhje me shkollën “Naim Frashëri” në Reçicë të Vogël, tha se për momentin mësojnë vetëm nxënësit e klasave të para dhe të dyta.
Kasami u pyet edhe për numrin e nxënësve të klasave të para, ndërsa njoftoi se ka ulje prej 100 nxënësve në krahasim me vitin e kaluar./Nistori/