Në 10 vitet e fundit, Maqedoninë e Veriut e kanë lëshuar 2000 mjekë, shifër kjo që tregon se mjekësia në Maqedoninë e Veriut po rrezikon të mbetet pa mjek, alarmojnë nga Oda e Mjekëve. Derisa kryetari i Odës së Mjekëve, Goran Dimitrov, paralajmëron se ikja e mjekëve nga Maqedonia e Veriut në këto 10 vitet e fundit është shumë më e lartë në krahasim me para 10 vite, për Ministrin e Shëndetësisë, Bekim Sali e gjitha që duhet të bëhet është reduktimi i reparteve shëndetësore nëpër disa komuna siç janë Struga dhe Ohri.
“Reduktim i institucioneve shëndetësore dhe jo i personelit mjekësor, që nënkupton se nuk kemi nevojë në dy qytete që janë afër njëra tjetrës të kemi 8 kujdestari kur mund të kemi dy, gjithçka mund të racionalizohet dhe ne po punojmë në këtë drejtim”, deklaroi Sali duke shtuar se masa parandaluese për eksodin e mjekëve janë ndërmarrë me mundësinë që i është dhënë mjekëve të rinj për të punuar me pagesë, rritje të pagave për gjithë të punësuarit, sigurim i fondeve për mjekët specializantë privat, si dhe vlerën e shtuar të kapitacionit për mjekësinë e përgjithshme, gjinekologji, dhe stomatologji.
Ndonëse për Ministrinë e Shëndetësisë gjendja nuk është edhe aq e rëndë, në terren situata duket krejt ndryshe. Në një bisedë me gazetën KOHA, mjeku Zekirija Shaini nga Kumanova tha se arsyet që mjekët po zgjedhin vendet e BE-së për të punuar janë të shumta, por që mbizotëron mungesa e perspektivës. “Mjekët e rinj nuk shohin një perspektivë të mirëfilltë këtu, duke filluar që nga sistemi shëndetësor e deri tek kushtet që u ofrohen, pasi shumica e mjekëve të rinj kërkojnë që specializimin ta vazhdojnë menjëherë pas studimeve dhe duke pasur parasysh që studimet në mjekësi zgjasin deri 6 vite, atyre ju nevojitet një pagë mesatarisht e mirë që të mund të jetojnë në mënyrë dinjitoze”, tha Shaini.
Sipas tij, arsye tjetër që mjekët më cilësorë po e lëshojnë vendin është sepse nuk duan të bëhen “vegël” e asnjë partie politike. “Në institucione nuk mund të depërtosh nëse nuk je i përfshirë në ndonjë parti politike, dhe nëse realisht vazhdohet kështu, Maqedonisë së Veriut do i ikin të gjitha kuadrot cilësore dhe do të vijmë në situatë që s’do kemi mjek. Prandaj e nevojshme është që të ndërmerren masa për të evituar largimin e mjekëve nga vendi, sistemi shëndetësor të rregullohet në atë mënyrë që mjekët e rinj të kenë një punë të siguruar me një pagë mesatare, të ju jepet hapësirë që të specializohen në të gjitha fushat, të ju mundësohen trajnime cilësore jashtë Maqedonisë së Veriut”, theksoi ai. Si përfundim ai potencoi se paga që ju jepet atyre është përçmim duke pasur parasysh mundin, sakrificën, stresin dhe lodhjen që u krijohet mjekëve nga orët shtesë që i kalojnë në punë.
Maqedoninë e Veriut për shkak të nepotizmit, ndërhyrjes politike në përzgjedhjet se kush do të shkojë në specializim e braktisi edhe Rexhail Ramadani nga Kumanova. “Nuk mu ofrua një vend pune, nuk mu dha mundësia për të specializuar, u eliminova nga shumë konkurse pune dhe pas 5-6 vite përpjekje fillova që privatisht të specializojë për mjekësi interne”, tha Ramadani duke treguar se i është nevojitur që të punojë si profesor në shkollën e mesme të mjekësisë në mënyrë që të mbulojë harxhimet, pasi çmimi i specializimit shkonte deri në 8000 euro. Në vitin 2015 ai vendosi që karrierën si mjek ta ndërtojë në Gjermani, ku siç thotë ai, suksesi varej nga aftësitë profesionale dhe jo nga mbështetja e partive politike. Që fillimi ka qenë i vështirë e konfirmon vetë ai pasi i është dashur të mësojë gjuhën gjermane, mënyrën se si funksionon sistemi por ai beson se çdo vështirësi i ka benefitet e saja pasi ai ka arritur që të avancohet në punën e tij. /Kohamk/
