Sot në Vicë të Tetovës u inaugurua lapidari kushtuar veterantit të Ushtrisë Çlirimtare Kombëtare, Lezam Ramadani – La Xam. Në ceremoninë përkujtimore morën pjesë figura të rëndësishëm, ish-komandantë të UÇK-së. Fjalim rasti morën bashkëluftëtarë të La Xamit nga Shqipëria e Kosova, shkruan Nistori.
“Po ngritet një përkujtimore për komandantin e Njësitit të mbrojtjes territoriale, La Xamit, i cili në kujtesë më ka mbetur nga sulmet e rrethimet që na bëheshin shkathtësia e tij. Rrugë në rrugë, e derë më derë, duke bërë thirrje, duke grumbulluar armatime, duke mobilizuar njësitin e fshatit që ata të dalin në vendin e duhur”, deklaroi i pari i BDI, Ali Ahmeti, atëherë komandat i UÇK.
Ahmeti tha se kauza e UÇK-së doli fitimtare, si në luftë, diplomaci, por edhe në drejtësinë ndërkombëtare.
Fjalë rasti mori edhe njëri prej ish-komandantëve të UÇK, Hazbi Lika, i cili tha se La Xam ishte një ndër pikat referuese për veprimet e UÇK në malësinë e Tetovës. Ai ka qenë shpresë për gjeneratat e reja, sepse ka vepruar vazhdimisht që amanetet e dëshmorëve të realizohen një ditë.
Të pranishmëve iu drejtua edhe gjenerali Gëzim Ostreni, Fazli Veliu – Daja dhe disa bashkëluftëtarë tjerë.
Djali i La Xamit tha se amaneti i babës ka qenë “një jetë është pak për kombin”. /Nistori/
