Ditë më parë Nistori njoftoi se Ibin Emshiu nga Siniçani, të cilit i vdiqën babai dhe vëllai në spitalin modular që u kaplua nga flaka, është kërcënuar me vdekje për paraqitjet e tij në opinion, me qëllim për ta heshtur dhe të mos flet për atë çfarë i ka ndodhur. Por, policia e Tetovës për Nistori thotë se deri në këtë moment nuk ka raportuar ndonjë prej familjarëve të viktimave se është kërcënuar nga dikush.
“Deri në këtë moment, në SPB-Tetovë nuk ka të raportuar se dikush e ka kërcënuar atë person”, shprehet zëdhënësi i SPB- Tetovë, Marjan Josifoski.
SPB Tetovë njofton se ata do të kontaktojnë menjëherë me personin dhe do të merren masat e duhura në lidhje me rastin.
Përndryshe në tragjedinë e 8 shtatorit në Tetovë, vdiqën 14 persona dhe 12 u lënduan. Pas çka, ministri i Shëndetësisë, Venko Filipçe, zëvendës ministri i shëndetësisë, Ilir Hasani, drejtori i spitalit të Tetovës, Florin Besimi dhe drejtori ekonomik i spitalit të Tetovës, dhanë dorëheqje, sipas tyre, si akt moral. /Nistori/
