Një vit nga hyrja në sallën e gjyqit dhe gati dy vjet nga vendosja në listën e zezë amerikane, ende nuk ka vendim për kryetarin aktual të Strugës, Ramiz Merko.
Ndonëse ka kaluar saktësisht një vit që kur filloi procesi i parë ndaj tij më 26 prill të vitit të kaluar, për blerjen e makinës luksoze Audi A6 dhe tre makinave të tjera me vlerë prej 114 mijë eurove, jo vetëm që nuk i duket fundi, por muajin e kaluar, gjyqi nisi sërish nga e para.
Deri në zgjedhjet lokale ka edhe gjysmë viti, andaj pyetja është nëse Merko deri atëherë do ta dëgjojë vendimin e parë. Aktualisht janë nëntë raste gjyqësore aktive kundër tij. Edhe ekspertët nuk janë shumë optimistë se kjo do të ndodhë.
“Për disa nga këto lëndë pritet që të paktën të ketë aktgjykim të shkallës së parë, sepse disa prej tyre nuk janë çështje të reja që sapo kanë filluar dhe nuk janë çështje komplekse. Pra në disa raste mund të pritet, por nuk besoj se do të ketë vendim përfundimtar deri në fund të këtij viti”, tha Darko Avramovski – Koalicioni “Të gjithë për gjykim të drejtë”.
Në maj të vitit 2024 filloi gjykimi për emërimin e paligjshëm të drejtorit në shkollën fillore në Llabunishtë, por nuk po i duket fundi këtij rasti dhe katër të tjerëve, ku Merko akuzohet për të njëjtat arsye.
Seancat gjyqësore për të gjitha rastet ndaj Merkos shtyhen disa herë, shpesh me justifikime banale, si për shembull se dëshmitarët kanë festë familjare apo se u ka filluar sezoni i ndërtimit, siç ishte rasti në një nga seancat e mëparshme, andaj gjykatësi urdhëroi sjelljen e dëshmitarëve me ndihmën e policisë.
“Sa i përket vonesave, ky është problem me të cilin përballen shumë gjykata. Mundësitë e gjykatës janë relativisht të kufizuara, por në fund të fundit, gjykata ka mekanizma të caktuar që mund të përshpejtojnë rrjedhën e gjykimit pa shkelur të drejtat e mbrojtjes. Megjithatë, ne shohim në praktikë që ata shpesh hezitojnë t’i përdorin këto mekanizma të gjyqit, shpesh mbeten pa i përdorur dhe prandaj kemi kohëzgjatje të këtillë të seancave, që nuk do të kishte ndodhur nëse do të kishim menaxhim të duhur gjatë diskutimeve”, u shpreh Darko Avramovski – Koalicioni “Të gjithë për gjykim të drejtë”.
Prokuroria Themelore Publike në korrik të vitit të kaluar ka ngritur aktakuzë kundër 11 personave fizikë dhe një personi juridik lidhur me ndërtimin e paligjshëm të objektit pranë pishinës së një hoteli në Strugë, ndër të cilët Merko është i akuzuari i tretë.
Pronari i një kompanie ka paraqitur kërkesë për rikonstruksionin e pishinës së hotelit, por ka marrë leje nga kryetari i komunës së Strugës për të ndërtuar objekt të tërë. Por edhe ky gjykim assesi të fillojë. Merko përballet me akuza të kryera në periudha të ndryshme. Javën e ardhshme, ai do të kthehet në bankën e të akuzuarve. /Alsat/
