është koha që Bashkimi Europian të bëjë hapin e vet përpara
“Edhe sot jam i bindur se procedura ime e mbajti gjallë procesin e integrimit. Çdo shumicë e re do të ishte një thikë në arkivol dhe do të ishte fund i aspiratës së qytetarëve në rrugën tonë europiane. Unë do të vazhdoj ta bëj këtë edhe në të ardhmen.” – kështu është përgjigjur deputeti Kastriot Rexhepi në pyetjen e “Fokus”-it se si do të veprojë nëse Maqedonia nuk i fillon negociatat me BE-në këtë qershor, duke qenë se kur iu bashkua shumicës qeverisëse arsyeja kryesore e tij ishte të kontribuonte në përparimin e Maqedonisë në rrugën e BE.
“Nuk ka asnjë devijim nga anëtarësimi në Bashkimin Europian, nuk ka ndërprerje të reformave, ne nuk heqim dorë nga dëshira që Maqedonia e Veriut të jetë anëtare e Bashkimit Europian dhe një shtet europian me të gjitha standardet. Kjo është agjenda europiane nga e cila kjo Qeveri dhe unë nuk do të heqim dorë kurrë, sepse Maqedonia e Veriut nuk ka rrugë tjetër përveç asaj europiane. Kemi fqinjë, kemi miq, kemi aleatë, jemi bërë shtet serioz. Ne do të qëndrojmë të përkushtuar dhe do t’ia dalim”, tha Rexhepi
Ai shtoi se qeveria po bën përpjekje serioze me mbështetjen e shumicës parlamentare për të nisur sa më shpejt negociatat dhe mbështetja e ShBA-së dhe BE-së janë vetëm një motiv plus në përpjekjet për heqjen e vetos dhe përkushtimin e fortë për dialogun me Bullgarinë fqinje për të gjetur një zgjidhje europiane si për shtetet ashtu edhe për popujt.
“Ne kemi bërë pjesën tonë, kemi bërë më shumë nga sa pritej dhe tani është koha që Bashkimi Europian të bëjë hapin e vet përpara, veçanërisht në këto kohë krize, sigurie, ekonomike dhe energjie, kur nuk nevojitet shpërbërja, por përkundrazi, bashkimi i Unionit. Deri më tani, ofertimi për data na ka sjellë vetëm zhgënjim për të gjithë ne. Prandaj, as unë dhe as kjo qeveri nuk do të theksojmë një datë të caktuar, por mendoj se është koha e duhur që Presidenca franceze e Bashkimit Evropian të japë një sinjal të qartë dhe progres serioz në procesin e zgjerimit, veçanërisht tani pas rizgjedhjes së Presidentit Makron, tha deputeti.
Mirëpo, Rexhepi paralajmëron se ngecja në politikën e zgjerimit të Unionit ndikon negativisht në kredibilitetin e vetë Unionit, por gjithashtu lë shumë hapësirë për ndikime jodemokratike dhe joliberale.
Sigurisht që kjo Qeveri, thotë ai, do të vazhdojë të udhëhiqet nga ideja se na duhen reforma dhe nuk do të lejohet hapësirë për zhgënjim dhe izolim.
“Për më tepër, shumica e bashkëqytetarëve tanë besojnë se ne duhet të vazhdojmë procesin e integrimit në familjen europiane. Procesi i europianizimit është në fakt një proces reformash dhe prandaj ne mbetemi në një nivel të lartë të përkushtimit për të punuar në zbatimin e tyre. Po ashtu, ka iniciativa rajonale, të cilat hapin hapësirë për bashkëpunim të ri dhe hapin mundësi të reja për qytetarët, si vlerë e shtuar në zhvillimin dhe përparimin e shoqërisë në rrugën drejt Bashkimit”, përfundon Rexhepi.
Rexhepi ka hyrë në Kuvend si deputet i Lëvizjesa Besa, ndërsa nëntorin e kaluar papritur iu bashkua shumicës qeverisëse të udhëhequr nga LSDM-ja, kur u prish situata nëse Qeveria do ta mbajë shumicën apo do të votohej mosbesimi. Ende mbetet enigmë nëse ai nuk e votoi mocionin për shkak të një rrëmbimi spekulativ për të, kërcënimi, arsyet pse partia “E majta” ishte në tavolinën e partive që duhej ta votonin mosbesimin e qeverisë apo për arsye parimore, siç thoshte atëherë “eurointegrimet”. /Nistori/
