Ministri i Jashtëm austriak Aleksander Shalenberg tha sot në Sofje se Vjena shpreson që negociatat me Shqipërinë dhe Republikën e Maqedonisë së Veriut për anëtarësimin e tyre evropian të fillojnë në qershor.
Shallenberg shtoi se një “mënyrë e ndryshme jetese” nuk duhet të lejohet në rajonin e Ballkanit Perëndimor.
“Interesat ruse shtrihen jo vetëm në Ukrainë, por edhe në vendet e Ballkanit Perëndimor,” paralajmëroi ai në Sofje.
Shalenberg pati një takim në Sofje me Ministren e Jashtme bullgare Teodora Gençovska, e cila diskutoi edhe për situatën gjeopolitike pas pushtimit rus.
Në një konferencë për media, Gençovska theksoi se Bullgaria ka mbështetje të vazhdueshme për rrugën evropiane të vendeve të Ballkanit Perëndimor.
“Bullgaria ka bërë përpjekje të konsiderueshme për të promovuar një klimë pozitive në marrëdhëniet dypalëshe me Republikën e Maqedonisë së Veriut, duke përfshirë inicimin e formateve për zhvillimin e zgjeruar të politikave sektoriale. Ne do të vazhdojmë të punojmë në ndërtimin e marrëdhënieve reale të fqinjësisë së mirë me Republikën e Maqedonisë së Veriut. Megjithatë, ato janë të mundshme vetëm me përpjekje të përbashkëta. Presim veprime konkrete dhe garanci nga Shkupi për zbatimin e përhershëm dhe të pakthyeshëm të Marrëveshjes së vitit 2017, si dhe garantimin e të drejtave të qytetarëve të Republikës së Maqedonisë së Veriut me vetëdije bullgare”, tha ajo.
