Qindra qytetarë u vendosën sot para kryeministrisë në ditën e gjashtë të protestës kundër rritjes së çmimit të ushqimeve dhe hidrokarbureve.
Veç kryeqytetit, protestat paqësore vijuan edhe në qytete të tjera të vendit. Paketa e Rezistencës Sociale e miratuar nga qeveria nuk është masa e duhur sipas protestuesve, pasi është anashkaluar pjesa tjetër e popullsisë.
Çdo ditë jave ata do të takohen në orën 17:00 përballë kryeministrisë, ndërsa e shtuna do të jetë marshim kombëtar.
Kjo revoltë e qytetarëve erdhi pas rritjes së menjëhershme të çmimit të produkteve ushqimore dhe hidrokarbureve si efekt i luftës në Ukrainë. Dy ditë më parë, Bordi Kombëtar i Menaxhimit të Hidrokarbureve vendosi që çmimi i naftës të shkonte 217 lekë për litër.
