Materialet më të shtrenjta të ndërtimit dhe rregullat aktuale në Ligjin për Prokurim Publik, vënë në pikëpyetje realizimin e një pjese të investimeve kapitale.
Sektori i ndërtimit në vend thotë se rregullat duhet të ndryshohen urgjentisht, sepse projektet e mëdha infrastrukturore janë marrë vesh me shtetin kur çmimet e ndërtimit ishin shumë më të ulëta se sot. Tani me rritjen e çmimeve, projektet ose do të mbeten të papërfunduara ose kompania do të falimentojë, nëse shteti nuk e ndihmon.
“Nëse nuk kemi një zgjidhje të unifikuar që do të jetë e shpejtë, sepse nëse nuk është e shpejtë dhe nëse hyjmë në sezon, dhe nëse nuk kemi zgjidhje, besoj se në qershor 80% e projekteve kapitale nuk do punohen”, deklaroi Andrea Serafimovski -Kryetar i Shoqatës së Ndërtuesve.
Ndonëse realizimi i projekteve kapitale ka dështuar prej vitesh edhe pa këto probleme, autoritetet besojnë se edhe ky vit do të jetë rekord sipas nivelit të investimeve shtetërore.
“Në tremujorin e parë të këtij viti janë realizuar 12,9% e shpenzimeve kapitale të planifikuara, që është 23,5% më shumë krahasuar me të njëjtën periudhë të vitit të kaluar…”, njoftojnë nga Ministria e Financave.
Sipas informacionit nga ndërtuesit, ka një rritje në çmimin me shumicë dhe pakicë të të gjitha materialeve të ndërtimit. Ekziston një rritje e shumëfishtë e çmimit të rërës, çmimi i tullave është rritur me 40 për qind, hekuri me 60 dhe materiali izolues për 50%. /Alsat/
