Pas gati një viti hetimesh, Prokuroria Themelore Publike e Koçanit ka ngritur aktakuzë kundër tre personave dhe ka paraqitur propozim-aktakuzë kundër gjashtë të tjerëve, të dyshuar për përfshirje në veprime korruptive që lidhen me diskotekën “Pulse”, ku nga zjarri tragjik i vitit të kaluar humbën jetën 63 persona dhe u plagosën mbi 200 të tjerë, përcjell Nistori.
Nëntë të akuzuarit dyshohen për vepra penale që përfshijnë marrjen dhe dhënien e ryshfetit, keqpërdorimin e pozitës dhe autorizimeve zyrtare, zbulimin e sekretit zyrtar dhe falsifikimin e dokumenteve zyrtare.
Sipas njoftimit të Prokurorisë Publike të Republikës së Maqedonisë së Veriut, procedurat penale përfshijnë kontrollorë tatimorë të Drejtorisë së të Ardhurave Publike (DAP), punonjës të Inspektoratit Shtetëror të Tregut, si dhe pronarin e diskotekës “Pulse” dhe djalin e tij.
Ndryshe nga aktakuza, propozim-aktakuza nuk i nënshtrohet procedurës së shqyrtimit dhe miratimit nga këshilli për vlerësimin e aktakuzës, ndërsa procedura gjyqësore zhvillohet sipas afateve të shkurtuara.
Syze dhe një orë dore në këmbim të informacioneve për kontrollet
Sipas Prokurorisë, dy inspektorë tatimorë akuzohen se kanë kërkuar dhe pranuar syze dhe një orë dore si ryshfet nga një person i tretë, i cili, bazuar në të dhënat e publikuara, dyshohet të jetë Mihajlo Jovanov, djali i pronarit të diskotekës “Pulse”.
Në këmbim të këtyre dhuratave, inspektorët dyshohet se kanë ofruar informacione për kontrollet e jashtëzakonshme dhe të paparalajmëruara në subjektet afariste ku Jovanov ishte person përgjegjës.
“Është ngritur aktakuzë kundër dy inspektorëve tatimorë për veprën penale ‘Marrje ryshfeti’, sipas nenit 357 të Kodit Penal, ndërsa njëri prej tyre akuzohet për dy vepra të tilla. Ata kanë kërkuar dhe pranuar syze dhe një orë dore nga personi i tretë, i akuzuar për veprën penale ‘Dhënie ryshfeti’, sipas nenit 358 të Kodit Penal, me qëllim që ta informonin për kontrollet e jashtëzakonshme dhe të paparalajmëruara në kompanitë ku ai ishte person përgjegjës”, thuhet në njoftimin e Prokurorisë.
Sipas organit të akuzës, megjithëse ishin të vetëdijshëm se ligji ua ndalonte zbulimin e informacioneve që lidheshin me procedurat tatimore, i akuzuari i parë i kishte përcjellë të akuzuarit të tretë, përmes aplikacionit Viber, informacione mbi veprimet e Drejtorisë së të Ardhurave Publike dhe Ministrisë së Punëve të Brendshme (MPB) ndaj kompanive përkatëse.
Për këto veprime, inspektorët akuzohen edhe për veprën penale të vazhduar të zbulimit të sekretit zyrtar, sipas nenit 360 të Kodit Penal.
Dy inspektorët tatimorë përballen gjithashtu me akuza për keqpërdorim të pozitës dhe autorizimeve zyrtare, sipas nenit 353 të Kodit Penal.
Sipas Prokurorisë, gjatë një kontrolli të kryer më 6 mars 2024 në një kompani ku i akuzuari i tretë ishte person përgjegjës, inspektorët kishin konstatuar parregullsi dhe qarkullim të paregjistruar financiar. Megjithatë, ata nuk i kishin evidentuar këto shkelje në procesverbalin zyrtar.
Si pasojë, buxheti i shtetit dyshohet se është dëmtuar për 98.400 denarë, shumë që do të duhej të arkëtohej në formën e gjobës për kundërvajtjen e konstatuar.
Paralajmërime për kontrollet dhe falsifikim i procesverbaleve
Për të fshehur parregullsitë e konstatuara, inspektori i dytë i akuzuar dyshohet se ka falsifikuar procesverbalin zyrtar të kontrollit. Për këtë arsye, ai ndiqet penalisht edhe për veprën e falsifikimit të dokumentit zyrtar, sipas nenit 361 të Kodit Penal.
Ndërkohë, propozim-aktakuza përfshin katër kontrollorë dhe inspektorë të tjerë tatimorë, të cilët akuzohen për keqpërdorim të pozitës dhe autorizimeve zyrtare. Njëri prej tyre akuzohet gjithashtu për falsifikim të dokumentit zyrtar.
Përveç tyre, një punonjës i Inspektoratit Shtetëror të Tregut akuzohet për zbulim të sekretit zyrtar, pasi dyshohet se ka përcjellë informacione lidhur me kohën kur institucioni do të kryente kontrolle inspektuese.
Edhe pse Prokuroria nuk i ka bërë publikë emrat e të akuzuarve dhe të kompanive të përfshira, nga përshkrimi i rastit mund të identifikohet se i akuzuari i gjashtë është Dejan Jovanov-Deko, pronari i diskotekës “Pulse”.
Sipas Prokurorisë, kontrollorët dhe inspektorët e akuzuar të Drejtorisë së të Ardhurave Publike kishin kryer kontrolle tatimore në subjekte juridike, pronari i vërtetë i të cilave ishte Jovanov.
Megjithëse gjatë kontrolleve ishin konstatuar parregullsi, ato nuk ishin evidentuar në dokumentacionin zyrtar, ndërsa procesverbalet e inspektimeve dyshohet se ishin falsifikuar.
Si rezultat, kompanive nuk u ishin shqiptuar gjobat e parashikuara me ligj.
“Kontrollorët dhe inspektorët e akuzuar kanë kryer kontrolle tatimore në subjekte juridike, pronari i vërtetë i të cilave është i akuzuari i gjashtë, babai i personit të akuzuar për dhënie ryshfeti. Megjithatë, ata nuk i kanë evidentuar parregullsitë e konstatuara dhe kanë falsifikuar procesverbalet e kontrolleve të kryera. Si pasojë, kompanive nuk u janë shqiptuar gjobat e përcaktuara me ligj. Vetë pronari i vërtetë i kompanive i ka ndihmuar ata në keqpërdorimin e pozitës zyrtare”, thuhet në njoftimin e Prokurorisë.
Katër persona nuk do të ndiqen më penalisht
Prokuroria ka njoftuar gjithashtu se katër persona, të cilët fillimisht ishin përfshirë në kallëzimin penal për veprime që lidheshin me keqpërdorimin e pozitës dhe autorizimeve zyrtare, nuk do të përballen me ndjekje të mëtejshme penale.
Për dy prej tyre, procedura është ndërprerë për shkak të parashkrimit të veprave penale.
Ndërkaq, për dy personat e tjerë, hetimet kanë treguar se nuk kanë kryer veprime që përbëjnë vepër penale sipas nenit 353 të Kodit Penal, apo ndonjë vepër tjetër penale që ndiqet sipas detyrës zyrtare.
Hetimet nisën pas publikimit të dokumentarit investigativ
Prokuroria Themelore Publike e Koçanit kishte nisur hetimet ndaj kontrollorëve dhe inspektorëve tatimorë në fund të nëntorit të vitit të kaluar, për shkak të dyshimeve për veprime të paligjshme që lidheshin me funksionimin e diskotekës “Pulse”.
Fillimisht, procedura përfshinte 11 persona, mes të cilëve edhe dy kontrollorë tatimorë nga shërbimi i kontrollit tatimor pranë Drejtorisë Rajonale të Shtipit. Ata dyshoheshin se kishin manipuluar raportet e kontrolleve dhe kishin pranuar dhurata në këmbim të informacioneve.
Sipas raportimeve të disa mediave, njëri nga kontrollorët tatimorë ndaj të cilit ishte hapur hetim, dhe që dyshohet se është i akuzuari i parë në aktakuzë, është vëllai i kryetares së Gjykatës Themelore Penale në Shkup, Daniela Dimovska.
Para fillimit të hetimeve, Laboratori i Gazetarisë Investigative (IRL) kishte publikuar, në shtator të vitit të kaluar, dokumentarin investigativ me titull “Kompromisi ynë moral”.
Dokumentari përmbante rreth 22 minuta e 30 sekonda komunikime të shkruara, të zhvilluara përmes aplikacioneve të mesazheve ndërmjet pronarëve të diskotekës dhe inspektorëve të Drejtorisë së të Ardhurave Publike dhe Inspektoratit Shtetëror të Tregut.
Sipas IRL-së, komunikimet e siguruara nga një sinjalizues tregonin se disa inspektorë i paralajmëronin pronarët e objektit për kontrollet e planifikuara.
Në disa prej mesazheve shfaqeshin gjithashtu biseda që sugjeronin se një orë dore po diskutohej si dhuratë për një zyrtar publik.
Këto zbulime ngritën dyshime serioze për ekzistencën e një rrjeti korrupsioni dhe bashkëpunimi të paligjshëm ndërmjet pronarëve të diskotekës dhe zyrtarëve të institucioneve përgjegjëse për mbikëqyrjen dhe kontrollin e veprimtarisë së saj.
