PREÇ ZOGAJ
I ngarkuari i Departamentit të Shtetit për Ballkanin Perëndimor, zoti Gabriel Eskobar, i tha të gjitha gjatë vizitës së tij në Tiranë dhe sidomos në intervistën që i dha gazetarit Sokol Balla për televizionin News 24.
Tha se SHBA nuk e takojnë Sali Berishën të shpallur non gratta prej tyre, tha se PD do të ketë pasoja nëse rimerret nga një person i shpallur non grata, tha se kjo masë ndëshkuese është një përpjekje midis agjencive , midis shumë agjencive , që përfshijnë Departamentin e Thesarit, FBI-në, Departamentin e Sigurisë Kombëtare, Departamentin e Shtetit për të kuptuar ku është korrupsioni dhe ku është ndikimi gërryes i tij. Tha se shpallja e Berishës ka nisur nga administrata e mëparshme e Presidentit Tramp, tha se SHBA ndjekin korrupsionin aty ku është, se non grata është një vendim institucional, jo politik. Do të thotë se nuk ndjekin parimin e balancimit, kaq ne shtetin iks, kaq në shtetin ypsilon, kaq nga qeveria, kaq nga opozita, por shohin ku është korrupsioni konkretisht, ku është minimi i demokracisë dhe pengimi i drejtësisë që janë tre motivet bazë të ndëshkimit me non grata; Zoti Eskobar tha do të shohim më shumë raste në Ballkanin Perëndimor, domethënë edhe në Shqipëri. Tha se SHBA bëjnë pjesën e tyre me instrumentin që kanë në duar sipas ligjit amerikan, se provat i jepen drejtësisë, se Shqipëria dhe drejtësia shqiptare duhet të bëjnë pjesën e tyre në betejën kundër korrupsionit. Zyrtari i lartë amerikan rrezoi ne këtë mënyrë gjithë narrativën e Berishës nga një foltore në tjetrën për shpalljen e tij non grata dhe prognozat e lehta e libreske të atyre që flasin për një “ gabim që do të korrigjohet shpejt” nga SHBA. Zoti Eskobar tha edhe plot gjera të tjera të reja, me interes dhe me vlerë për marrëdhëniet mes dy vendeve, ku spikat dëshira e SHBA për të thelluar marrëdhëniet strategjike me Shqipërisë , sikurse la të kuptohej qartë se SHBA janë të pakënaqur me qeverinë dhe me produktin e deritanishëm të drejtësisë së re.
Por le të qëndrojmë te pohimet dhe qëndrimet zyrtare të SHBA që lidhen me ngjarjet dhe me krizën që po përjeton Partia Demokratike. Tani askush nuk mund të thotë “ nuk dinim gjë”. Të zgjedhurit e çdo niveli të kësaj partie presupozohen se janë njerëz politikë që informimin e kanë ushqimin e tyre të përditshëm. Ata nuk mund të thonë “ nuk e dinim”. Askush nuk mund të thotë nuk e dinim. Vetë Sali Berisha me përvojën e madhe që ka e kupton mirë zyrtarin amerikan kur ky i fundit thotë “ kemi një politikë” në raste se PD merret nga një person i shpallur non grata prej tyre. Berisha e kupton mirë se ngjarjet janë kombinuar kundër tij, se non grata në shkallë botërore është stuhia e re që kanë ngritur ShBA për të shpëtuar, shëndoshur e rivendosur demokracinë në altar përballë regjimeve autokratike siç është Rusia e Putinit apo regjimeve njëpartiake, siç është Kina, regjime që investojnë fuqishëm për të minuar antipodin e tyre, demokracinë.
Presidenti Biden po ndërton dhe po udhëheq aleancën e vendeve demokratike të Europës dhe botës në ketë betejë, duke i dhënë peshë të madhe shpalljes non grata të zyrtarëve të përfshirë në afera korruptive. Do të ketë një listë të gjatë. Shembujt e shumtë do ta vështirësojnë përpjekjen e Berishës për ta zhvlerësuar këtë instrument, duke u nisur nga rasti i tij. Atij do t’i mbetet të presë. Foltorja i shërbeu për të ndjerë mbështetjen e shumë demokratëve, afeksionin e tyre për të si lider historik, detyrimin e tyre njerëzor për ti ndenjur pranë në ditë të vështira. Kjo nuk është pak për kënaqësinë dhe sadisfaksionin e një veterani të politikës. Por në këtë moment, duke e ditur se nuk mund të bëjë asgjë, përveçse të presë, duhet të jetë Berisha ai që duhet tu kërkojë mbështetësve të mos sakrifikohen për të, por të bëhen pjesë e një PD-jë të bashkuar që mund të fluturojë drejt fitores pasi ka hequr gjylet e dualizmit dhe ka fituar bashkëpunimin e ngushtë me SHBA. Fitorja e PD-së do të ishte shansi me real, nëse ekziston një i tillë, edhe për vetë problemin e zotit Berisha./Panorama/