Rilind Dauti
Këto janë 20 kushtet (jo finale, por bazike) që duhet t’i plotësojë një hoxhë që të jetë i pranueshëm për kombin e sotëm shqiptar:
- Në vend të çallmes ta mbajë plisin,
- Shkollimin fetar të mos e ketë kryer në Meke ose Medinë, por në Mirditë,
- Të mos e flet asnjë fjalë arabisht, por vetëm shqip (fjalë të huazuara nga italishtja dhe anglishtja janë të pranueshme),
- Hutben e xhumasë ta fillojë me salavate për Gjergj Kastriotin,
- Tema e hutbes të jetë diçka kombëtare,
- Në xhami ta mbajë fotografinë e Nënë Terezës ashtu siç është në institucionet e shtetit sekular,
- Të shfrytëzojë retorikë fetare në mënyrë simbolike (si p.sh. “Kibla e shqiptarëve është kah Brukseli”),
- Në xhami të organizojë aheng për Vitin e Ri,
- Mjekrën ta ketë si Skënderbeu ose Babadimri,
- Në vend të Ebu Hanifës ta citojë Gjon Buzukun dhe Pjetër Bogdanin,
- Në vend të Ebu Bekrit dhe Hazreti Omerit, të shprehë respekt për Vrana Kontin dhe sahabët tjerë të Skënderbeut,
- Të mos shprehë solidarizim me muslimanët e shtypur nëpër botë (përpos kurdëve të shtypur nga Turqia),
- Të jep fetva që rakija është hallall përderisa e pin me kararë,
- Djemtë shqiptarë t’i inkurajojë të martohen me vajza të zhvirgjëruara para martese nga dikush tjetër,
- Të mos e kundërshtojë homoseksualizmin,
- Gratë transgjinore t’i pranojë si gra të vërteta (por mos t’ua bëjë obligative shaminë),
- Ta pranojë që shamia është simbol i shtypjes dhe prapambeturisë,
- Në Xhenetin e muslimanëve t’iu gjejë vend edhe jomuslimanëve,
- Ta shpallë haram fyerjen e Skënderbeut dhe figurave tjera kombëtare,
- Të jep fetva që nuk është obligative falja e namazit dhe agjërimi i Ramazanit, por mjafton ta kesh zemrën e mirë.
*Shkrimi është shkruar në veçanti për Nistori.com. Të drejtat e botimit i kanë vetëm Nistori dhe autori. Qëndrimet e autorëve jo me domosdoshmëri pajtojnë me politikën redaktuese të portalit.