Nëse Jeff Bezos zgjat jetët tona

    Paola Fallai

    Këto dy vite pandemie, me numrin e llahtarshëm të vdekjeve që po i afrohet gjashtë milionëve, i kanë përplasur në fytyrë vdekjen një bote që donte ta harronte. Megjithatë, jemi bij të qytetërimeve tepër të lashtë, që kanë ditur të ndërtojnë rite, kulte, tradita mbi përfundimin. Për mijëvjeçarë jemi ngushëlluar me jetën e përtejme; vetëm në dhjetëvjeçarët e fundit e këtejshmja fitoi, duke fshirë nga përfytyrimet tona jo vetëm vdekjen, por edhe pleqërinë, rënien e pashmangshme.

    Ja, e pashmangshme është mbiemër që Jeff Bezos nuk mund ta durojë. Miliarderi amerikan që me Amazonin ka përdredhur të gjithë zakonet tona të blerjes (duke i vërtetuar postave të gjithë botës që po, pakot mund edhe të arrijnë), nuk është mjaftuar me Tokën tonë të shkretë. E dini që projekte të rëndësishme private të hapësirës mbajnë emrin e tij. Nuk është mjaftuar të fitonte shumë më tepër se një shtet, 81 miliardë vetëm gjatë kësaj pandemie, sa do të mjaftonin për tri doza vaksinash për të gjithë banorët e tokës. Jo, tashmë ka vendosur të investojë tre miliardë në një sipërmarrje të re që merret me “luftën kundër pleqërisë” dhe “ripërtëritjen qelizore”. Do të zgjasë jetën së paku për 50 vite, sa për të filluar.

    Për të mos zhgënjyer ngazëllimin e tij, do të ishte mirë që këshilltarët e tij të mos i thonin që pavdekësia është një mit i ndjekur nga sumerët e mbrapa, duke kaluar përmes Platonit, duke mënjanuar Frankenshtajnin dhe duke u ulur mbi portretin e Dorian Gray. Madje do të ishte interesante të dihej se çfarë do të dëshironte të bënte me përfundimet e hamendësuara të një kërkimi kaq të pasur.

    Një e milionta e atij fondi do të mjaftonte për të filluar kërkimet mbi sëmundjet e rralla që pak i mbështesin. Besojmë që Bezzos recetën e hamendësuar kundër pleqërimit do ta vë në dispozicion të njerëzimit kokëfortë që kundërshton pleqërimin. Jemi të gjithë me të, njeriun e mundësive të pafundme, sepse edhe ne mendojmë se vdekja është një bezdi e padurueshme. /Burimi: “Corriere della Sera”/Përktheu: Eugjen Merlika/

    Lajmi Paraprak

    Në lojë nuk është vetëm Ukraina

    Lajmi i rradhës

    Nuk arrihet marrëveshja për pagën minimale për 18 mijë denarë

    Lajme tjera

    Një mot tjetër

    LEONARD DEMI Pushtimi gjakderdhës e barbar rus i Ukrainës është një shkelje e egër e ligjit ndërkombëtar dhe…
    Më tepër

    Bashkohu

    Informohu në kohë