Nëse fëmija juaj është sëmurë, mund të jetë shumë shqetësuese ta dëgjoni duke u kollitur. Fatmirësisht, këto zhurma në përgjithësi nuk janë asgjë serioze, por ato mund të jenë shenjë se një fëmijë ka nevojë për kujdes mjekësor.
Janë veçanërisht pesë shenja të rëndësishme që prindërit nuk duhet t’i injorojnë kurrë, njofton The Sun:
Pauza në frymëmarrje
Nëse fëmija juaj fillon të kollitet me pauza midis frymëmarrjeve, ai mund të vuajë nga apnea. Simptoma shfaqet kur fëmija juaj nuk ka pothuajse asnjë fluks ajri dhe vuan për të marrë dhe për ta nxjerrë frymën – që do të thotë se duhet të vizitojë një mjek.
Është gjithashtu e zakonshme te të rriturit, të cilët mund të vuajnë nga pauza në frymëmarrje gjatë gjumit – gjë që mund të jetë e rrezikshme.
Ndryshimi i ngjyrës
Shpesh është normale që fëmijët të skuqen në fytyrë gjatë një episodi kollitjeje. Por, mund të jetë e rrezikshme nëse bëhen të zbehtë, të kaltër ose të errët rreth gojës, buzëve ose fytyrës. Nëse vëreni se fëmijët bëhen të përgjumur ose nuk reagojnë gjatë këtyre episodeve, telefononi një ambulancë.
Vështirësi në rifitimin e frymëmarrjes
Një tjetër simptomë serioze për t’u përcjellë është kur fëmijët kanë vështirësi të rifitojnë frymën e tyre. Nëse kjo ndodh, ata mund të vuajnë nga një bllokim i rrugëve të frymëmarrjes, i cili mund të jetë serioz dhe kërkon ndihmë.
Zhurma gjatë frymëmarrjes
Nëse vëreni se fëmija juaj zhvillon një kollë shumë papritur, ka shumë të ngjarë të jetë shenjë e një sëmundjeje të zakonshme. Mirëpo, nëse kanë frymëmarrje të zhurmshme në qetësi ose ndonjë vështirësi në frymëmarrje, kërkoni ndihmë mjekësore.
Temperatura
Simptoma e fundit kryesore për të cilën duhet të jeni të kujdesshëm është kombinimi i kollitjes dhe temperaturës. Prindërit duhet t’i çojnë fëmijët e tyre te mjeku nëse kanë pasur një episod të frymëzënies të shoqëruar me temperaturë të lartë.
