Në kuadër të edicionit të 14-të të festivalit “Skena e Muzikës Serioze Shqiptare”, publiku në Shkup do të ketë mundësinë të ndjekë një mbrëmje të veçantë koncertale me Orkestrën Rinore të Ballkanit Perëndimor (Western Balkans Youth Orchestra – WBYO), përcjell Nistori.
Koncerti do të mbahet më 19 gusht 2026, në Sheshin Skënderbeu – Çair, Shkup, me fillim në ora 20:30.
WBYO është një orkestër ndërkombëtare rinore e themeluar në vitin 2019, që bashkon muzikantë të rinj profesionistë nga Shqipëria, Bosnja dhe Hercegovina, Kosova, Mali i Zi, Maqedonia e Veriut dhe Serbia. Përmes muzikës klasike dhe projekteve artistike, ajo synon të ndërtojë ura bashkëpunimi, mirëkuptimi dhe paqeje mes të rinjve të rajonit, duke kapërcyer dallimet kombëtare, etnike, fetare dhe kulturore.
Programi realizohet në bashkëpunim me “Be Embraced” dhe “Music of Today 2026”, iniciativa që mbështesin talentet e reja nga Ballkani Perëndimor, Evropa dhe më gjerë.
Mbrëmja koncertale do të sjellë një repertor të pasur simfonik, ku ndërthuren tradita dhe moderniteti, me vepra të Richard Wagner, Paul Dukas, George Enescu dhe Ottorino Respighi, si dhe me interpretimin e veprës fituese të një kompozitori të ri nga Ballkani Perëndimor.
Koncerti do të drejtohet nga Desar Sulejmani, pianist dhe dirigjent shqiptaro-gjerman i lindur në Shkodër. Ai ka përfunduar studimet në Folkwang University of the Arts në Essen dhe në Robert Schumann Hochschule në Düsseldorf, ku u specializua në piano dhe dirigjim orkestral. Që nga viti 2003 ka drejtuar orkestra të njohura në Gjermani dhe në skenën ndërkombëtare, ndërsa në vitin 2019 u emërua Drejtor Artistik dhe Dirigjent Kryesor i WBYO-së.
Festivali “Skena e Muzikës Serioze Shqiptare”, nën drejtimin e Afrim Farizit si drejtor festivali dhe Fatos Lumanit si drejtor artistik, përfaqëson një nga ngjarjet më të rëndësishme të muzikës klasike në Maqedoninë e Veriut dhe ka ndërtuar ndër vite një platformë prestigjioze për promovimin e artit muzikor shqiptar dhe ndërkombëtar.
Organizatorët theksojnë se ky koncert synon jo vetëm të ofrojë një përvojë artistike të nivelit të lartë, por edhe të frymëzojë brezat e rinj përmes bashkëpunimit kulturor dhe dialogut rajonal.
Informacion praktik:
Ngjarja: Koncert – Orkestra Rinore e Ballkanit Perëndimor (WBYO)
Data: 19.08.2026
Ora: 20:30
Vendi: Sheshi Skënderbeu, Çair – Shkup
Kuadri: Edicioni i 14-të i “Skenës së Muzikës Serioze Shqiptare”
Ky koncert pritet të jetë një nga aktivitetet më të spikatura kulturore të verës në Shkup, duke sjellë në një skenë të përbashkët energjinë krijuese të muzikantëve të rinj të Ballkanit Perëndimor dhe kryeveprat e repertorit simfonik evropian. /Nistori/
