Zgjedhjet do të mbahen në afatin e rregullt – këtë e ka përsëritur kryeministri Dimitar Kovaçevski pas thirrjeve të fundit të opozitës për organizimin sa më të shpejtë të zgjedhjeve të parakohshme parlamentare.
Lideri i opozitës, Hristijan Mickoski, madje ka kërkuar takim liderësh për të përcaktuar datën e zgjedhjeve, por qeveria e ka refuzuar si ide. Sipas Kovaçevskit, se në cilin muaj do të shpallen zgjedhjet, varet nga afatet që do t’i përcaktojë Kuvendi.
Ai u bëri thirrje përfaqësuesve të partive politike që të ulen dhe të diskutojnë për detajet e datës, pasi kjo do të varet edhe nga miratimi i mundshëm i ndryshimeve në Kodin zgjedhor.
Së shpejti ndryshimet pritet të hyjnë në procedurë parlamentare kurse OSBE dhe BE nuk rekomandojnë ndryshimin e rregullave zgjedhore gjashtë muaj para zgjedhjeve.
Mbetet të shihet edhe nëse zgjedhjet do të jenë të dyfishta. Siç tha më herët kryeparlamentari Talat Xhaferi, e vetmja datë kur zgjedhjet e rregullta parlamentare dhe ato presidenciale mund të përkojnë do të jetë 5 maji, pra java kur bien Pashkët vitin e ardhshëm.
Ndërkohë, sot mediat spekuluan se disa parti politike shqyrtojnë mundësinë e bojkotimit të raundit të dytë të zgjedhjeve presidenciale nëse zgjedhjet parlamentare nuk mbahen në të njëjtën ditë.
Nëse zgjedhjet presidenciale dështojnë, pra nëse nuk dalin më shumë se 40% e votuesve të regjistruar, atëherë kryeparlamentari Talat Xhaferi automatikisht do të ishte në krye të shtetit.
Të pyetur për një skenar të tillë, erdhi një përgjigje e pazakontë nga përfaqësuesit e qeverisë.
Gazetari: Për shkak të censusit të lartë në raundin e dytë, ekziston rreziku që zgjedhjet presidenciale të dështojnë kurse keni marrëveshje me BDI në 100 ditët e fundit që BDI të propozojë kryeministër. A jeni gati nëse zgjedhjet dështojnë, që Talat Xhaferi të jetë president, BDI të ketë kryeministër, që i gjithë vendi të jetë në duart e BDI-së?
Bytyqi: Nuk mendoj se duhet të qëndroj në pyetje të tilla.
Kovaçevski: Pyetja ishte absolutisht jokorrekte.
Mickoski më herët gjatë një interviste theksoi se VMRO-DPMNE nuk do t’i bojkotojë zgjedhjet presidenciale sepse kandidati i tyre do të jetë favorit. /Alsat/
