Bashkimi Evropian (BE) tha sot se djegia e kopjes së Kuranit ose çdo libri tjetër të shenjtë “është fyese dhe mosrespektuese dhe akt i qartë provokimi”, transmeton Anadolu.
Deklarata e bllokut erdhi pasi një person i identifikuar si Salwan Momika dogji një kopje të librit të shenjtë musliman nën mbrojtjen e policisë përpara një xhamie në Stokholm të mërkurën.
Provokimi ndodhi në ditën e Kurban Bajramit, një nga festat kryesore fetare islame të festuar nga muslimanët në mbarë botën.
“Manifestimet e racizmit, ksenofobisë dhe intolerancës që buron nga këto nuk kanë vend në Evropë”, tha në një deklaratë Nabila Massrali, zëdhënësja e BE-së për politikën e jashtme dhe sigurinë.
“BE-ja i bashkohet Ministrisë suedeze të Punëve të Jashtme në refuzimin e saj të fuqishëm të djegies së Kuranit nga një individ në Suedi. Ky akt në asnjë mënyrë nuk pasqyron opinionet e Bashkimit Evropian”, theksoi Massrali.
“Është edhe më e trishtueshme që një akt i tillë është kryer në festën e rëndësishme muslimane të Kurban Bajramit”, shtoi ajo.
