Viti 2020 ka shënuar rritje të numrit të kërcënimeve online ndaj gazetarëve dhe joefikasitet të institucioneve në ndëshkimin e sulmuesve. SHGM këtë vit regjistroi 14 sulme dhe kërcënime, shumica e të cilëve janë gazetare, ndërsa vetëm një nga këto raste është zgjidhur në gjykatat e Shkupit, përcjell Nistori.
“Në të tre treguesit kryesorë të raportit, siç janë korniza ligjore për lirinë e medias, pozicioni i gazetarëve në redaksi dhe siguria e gazetarëve, në vitin 2020 nuk ka ndryshime serioze në sferën e medias, por ka një tendencë në rritje të sulmeve, domethënë situata e sigurisë së gazetarëve dhe punonjësve mediatik nuk janë përmirësuar në krahasim me vitin e kaluar 2019, por përkundrazi është përkeqësuar”, thonë nga SHGM.
Për shkak të krizës ekonomike të shkaktuar nga pandemia, tregu mediatik dhe standardi social i gazetarëve dhe punonjësve të medias është përkeqësuar edhe më tej. Rroga mesatare e gazetarëve vazhdon të jetë e ulët. Megjithëse viti 2020 ishte i vështirë për mediet për shkak të rënies së të ardhurave nga reklamat, qeveria dhe rregullatori i medias, në një farë mase, kanë zbutur efektet negative nga kriza ekonomike nëpërmjet subvencioneve të mënyrave të ndryshme.
Në vitin 2020, vendi shënoi rritje në shkallën e Reporterëve pa Kufij, duke u renditur në vendin e 92-të nga 180 vende, tre vende më lart krahasuar me vitin 2019, përcjell Nistori.
Në raportin për vitin 2020 shoqatat e gazetarëve ShGM, SPGPM, IMM dhe KEMM theksojnë fuqimisht kundërshtimin e tyre ndaj ndryshimeve të mundshme në nenin 102 të Ligjit për Shërbimet Mediatike Audio dhe Audiovizive, të cilat do të lejonin reklamimin e institucioneve publike në media. ShGM, SPGPM, IMM dhe KEMM konsiderojnë se situata në industrinë e medias nuk duhet të kthehet në nivelin e katër ose më shumë viteve më parë, kur me fondet shtetërore, në mënyrë jotransparente, mediumeve u janë paguar shuma astronomike.
Burim shtesë i të ardhurave të medies ishin mjetet nga reklamat politike gjatë fushatës zgjedhore, por ekziston një shqetësim i përgjithshëm i shoqatave të gazetarëve, sepse kjo minon pavarësinë e politikës editoriale të medias.
Gazetarët dhe punonjësit e medias akoma janë ekonomikisht të pasigurtë dhe pothuajse nuk ekzistojnë marrëveshje kolektive me të cilat do të mbrohet të drejtat e tyre të punës.
Në dhjetor të vitit 2020, Gjykata Themelore civile në Shkup solli vendime me të cilat u pezulluan paditë e paraqitura nga gazetarët Natasha Stojanovska dhe Dushica Mërgja, të cilët kërkuan dëmshpërblim nga shteti për shkeljen e të drejtave të tyre gjatë ngjarjeve në Parlamentin e Republikës së Maqedonisë së Veriut më 27.04. 2017. Këto procese gjyqësore pasuan pas thirrjes paraprake të SHGM-së për të siguruar ndihmë juridike për gazetarët dhe punonjësit e medias të cilët u sulmuan ose u ishin shkatërruar pajisjet e tyre në Parlament gjatë asaj ngjarjeje të përgjakshme. Vendimet e tilla gjyqësore janë një tjetër provë se për gjykatën ka standarde të dyfishta kur bëhet fjalë për politikanë dhe gazetarë. /Nistori/
Raportin vjetor mund ta lexoni të plotë këtu.
