Për një punë më të mirë. Ky është shkaku që i mban gati pjesën më të madhe të popullsisë për t’u larguar nga vendi. Anketimi i Alma Carrier i bërë në 13 vende të Europës Juglindore tregoi se shtetasit nga Maqedonia ishin më të prirur për t’u larguar nga vendi, sesa të tjerët. Madje një synim të tillë e kishin pjesa më e madhe e atyre që paguhen me paga të larta dhe kanë pozicione të mira pune. 28% e të anketuarve janë përgjigjur se motivi më i zakonshëm për t’u larguar është puna më e mirë, gjegjësisht paga më e mirë. Në përgjithësi, thuhet në raport, 20% në Finlandë, 16% në Slloveni dhe 17% në Poloni janë më pak të gatshëm të lëvizin sesa 28% në Maqedoninë e Veriut ose 27% në Estoni.
Surprizë e hulumtimit ishte e dhëna se personat që jetojnë mirë në vendin e tyre shfaqin tendenca më të mëdha për t’u larguar. Më të gatshëm për t’u zhvendosur janë punonjësit me të ardhura më të larta dhe nivel më të lartë arsimor (29%), dhe ata janë kryesisht të gatshëm të zhvendosen vetëm për një punë brenda profesionit të tyre (55%). Zhvendosja me familje (60%) dhe potenciali për pagë më të mirë (60%) janë motivuesit kryesorë për të punuar jashtë vendit. Si destinacionet më të preferuara janë Gjermania me numrin më të madh të rasteve, pasuar nga Zvicra dhe Sllovenia. Zhvillimi i karrierës dhe zhvillimi profesional janë motivuesit kryesorë, ndërsa zhvillimi gjuhësor dhe kushtet politike ose ekonomike konsiderohen më pak të rëndësishme.
“Super të talentuarit kryesorë të Evropës Lindore nuk janë të gatshëm të lëvizin për punë me çdo kusht, por vetëm për një periudhë relativisht të shkurtër kohe, disa javë ose muaj, dhe është e rëndësishme që ata të mund të marrin familjen me vete. Një nga supozimet tona ishte se njerëzit në grupet me të ardhura më të ulëta me më pak arsim do të ishin grupet më domethënëse të interesuara për t’u zhvendosur pas një mundësie më të mirë pune. Sondazhi zbulon se përkundrazi është e kundërta, sa më i lartë të jetë arsimi dhe sa më i lartë të jetë paga, aq më shumë ka gjasa që punonjësit kryesorë të jenë të interesuar të zhvendosen brenda profesionit të tyre”, komenton drejtoresha e Alma Career, Vesa-Pekka Kirsi.
Ata me arsim fillor dhe të mesëm janë më të gatshëm (53%) të marrin në konsideratë një pozicion më të ulët jashtë vendit sesa kanë aktualisht nëse zhvendosen. Përkatësisht, ata me arsim pasuniversitar, master (55%) ose doktoraturë (57%), janë më pak të gatshëm të ndryshojnë pozicionet e tyre aktuale në një pozicion më të ulët jashtë vendit.
Në Evropën Qendrore, Ballkan dhe Baltik, si dhe në Finlandë, paga më e mirë është arsyeja më e fortë për të konsideruar një punë jashtë vendit, rreth 59-61% e njerëzve e përmendin atë si motivuesin e tyre kryesor. Faktori i dytë më i fortë është mundësia për të sjellë anëtarët e familjes, veçanërisht në Baltik dhe Finlandë, ku 42% e konsiderojnë të rëndësishme. Njësia e biznesit të shërbimeve ndërkombëtare të rekrutimit të Alma Career, koordinoi një anketë ndërkombëtare rreth gatishmërisë së punonjësve për t’u zhvendosur për një punë më të mirë. Mbi 76.000 të anketuar nga 13 vende të Evropës Qendrore Lindore morën pjesë në sondazh. /Koha/
