Numri i nxënësve në vend po bie nga viti në vit, një trend që tashmë po ndihet edhe në arsimin e lartë. Rektorja e Universitetit “Shën Kirili dhe Metodi”, Biljana Angelova, thotë se rënia e numrit të maturantëve po reflektohet drejtpërdrejt në regjistrimet në universitete.
“Kemi një rënie të përhershme të numrit të nxënësve të shkollave të mesme. Nëse dhjetë vjet më parë ky numër ishte mbi 20,000, tani ka tashmë rreth 14,000 nxënës të shkollave të mesme. Kjo reflektohet edhe në regjistrimet në arsimin e lartë. Ne e kemi ruajtur numrin e studentëve në USHKM për më shumë se 10 vitet e fundit dhe rreth 5,000 deri në 6,000 studentë regjistrohen në universitetin tonë çdo vit”. – Biljana Angelova- Rektore e Universitetit Shën Kirili dhe Metodi.
Sipas Angelovës, në këtë tablo ndikon edhe largimi i çifteve të reja nga vendi, dukuri që reflektohet edhe në popullsi. Ajo paralajmëron se trendi është alarmues.
“Unë besoj se ky është një fenomen alarmues dhe se duhet të merren masa sistemike për të mbajtur të rinjtë në vend, veçanërisht të rinjtë, dhe për të krijuar masa që do t’u ofrojnë atyre siguri dhe punësim, në mënyrë që sa më shumë të rinj të qëndrojnë në vend, që ky fenomen të ndryshojë në të ardhmen”. – Biljana Angelova- Rektore e Universitetit Shën Kirili dhe Metodi.
Për nevojën e një strategjie gjithëpërfshirëse flet edhe profesoresha universitare Kristina Nikolovska.
“Fatkeqësisht, ky trend duhet të përmirësohet në një kuptim pozitiv. Investimet duhet të bëhen që në moshë të re, nga nivelet më të ulëta të arsimit deri te nivelet më të larta të shkencës, deri në Akademinë e Shkencave. Kjo kërkon një strategji gjithëpërfshirëse”. – Kristina Nikolovska-Profesore.
Në dekadën e fundit, numri i nxënësve në arsimin fillor është ulur me 6,3 për qind, ndërsa në arsimin e mesëm me 19,6 për qind. Sipas Entit Shtetëror të Statistikave, numri i studentëve në arsimin e lartë ka rënë nga 59.359 në vitin akademik 2014/2015, në 53.535 në vitin 2024/2025, pra rreth 9,8 për qind më pak brenda dhjetë vjetësh. Njëkohësisht, gjithnjë e më shumë studentë po zgjedhin të studiojnë jashtë vendit. Numri më i madh është në Slloveni, ku në vitin akademik 2025/2026, sipas Zyrës Sllovene të Statistikave, studiuan më shumë se 1.000 studentë nga vendi./Alsat
