Komisioni për Ndalimin dhe Mbrojtjen nga Diskriminimi rreth një vit punon me një anëtar më pak. Kjo për shkak se 20 ditë pasi u zgjodh përbërja e re e këtij komisioni, njëra nga anëtaret dha dorëheqje. Që atëherë Kuvendi nuk ka zgjedhur anëtar të ri.
Kryetarja e komisionit për anti diskriminim Vesna Bendevska thotë se e kanë të vështirë të funksionojnë me një anëtarë më pak. Aq më tepër kur për çdo ditë qytetarët dërgojnë më shumë parashtresa në këtë komision.
“Punë ka shumë dhe anëtari i shtatë na mungon shumë. Mund të them se jemi duke e arritur numrin prej 200 lëndëve të cilat i kemi filluar. Sipas kompetencave tona të reja kemi edhe disa përfshirje në organet gjyqësore edhe si miq të gjykatës ose si të përfshirë në palën tjetër”- deklaroi Vesna Bendevska, kryetare e Komisionit për ndalimin dhe mbrojtjen nga diskriminimi.
Bendevska thotë se për çdo ditë u shtohen angazhimet edhe me rastet të cilat Komisioni për anti diskriminim i ngre me vetë iniciativë.
“Përveç parashtresave ne punojmë edhe për lëndë të cilat i hapim sipas zërave në opinion, me vetë iniciativë, dërgojmë rekomandime të përgjithshme për mbrojtje nga diskriminimi, plotësisht duhet të kujdesemi edhe për ngritjen e vetëdijes së opinionit, respektimin e të drejtës së barazisë”- pohoi Vesna Bendevska, kryetare e Komisionit për ndalimin dhe mbrojtjen nga diskriminimi
Megjithatë, për momentin zgjedhja e anëtarit të ri është e pamundur pasi Komisioni për zgjedhje dhe emërime në Kuvend ka mbetur pa kryetar. Deputeti i LSDM-së, Kostadin Kostadinov, i cili ishte kryetar, u largua nga pozita e deputetit për shkak se u zgjodh kryetar komune.
Të pyetur se kur do të emërohet kryetari dhe anëtari i ri i Komisionit për zgjedhje dhe emërime, nga Kuvendi nuk japin përgjigje konkrete por thonë se me aktivitet të tjera do të fillojnë pasi të votohet qeveria e re. Komisioni për ndalimin dhe mbrojtjen nga diskriminimi për momentin funksionon me gjashtë anëtarë. Ndërsa në konkursin e hapur nga Kuvendi për anëtarin e shtatë të këtij Komisioni kanë kandiduar 10 persona./Alsat/