Qytetarët e Kosovës për shkak të gjendjes së rënduar ekonomike, si zgjidhje po e shohin largimin nga vendi.
Një mënyrë më e lehtë aktualisht për ta është sigurimi i një vize pune për në Gjermani. Në mesin e këtyre qytetarëve është edhe Bekim Karaxha, që nga Kosova u largua rreth gjashtë muaj më parë.
Bekim Karaxha: Kushtet jo aq të mirë, rroga jo aq e mirë dhe jam larguar për një të ardhme më të mirë për fëmijët.
Karaxha këtë të martë pranë Ambasadës së Gjermanisë në Prishtinë po dërgon dokumentet e aplikimit për nipin e tij.
Bekim Karaxha: Ai shkollimin e kryen këtu edhe kurgjo e prap duhet të punojë kamerier ose shofer.
Sipas të dhënave të Ambasadës Gjermane për dy muajt e fundit janë rreth 100 mijë qytetarë që kanë aplikuar për rezervimin e një termini për aplikim për vizë pune.
Largimi në masë i fuqisë punëtore ka lënë sektorin e ndërtimtarisë me mungesa.
Faton Hoxha: Ne si ndërtues duhet të bëjmë zgjidhje. Janë duke ardhë prej Shqipërisë këtu me punu.
Qytetarët po shfrytëzojnë edhe trajnimet për aftësim profesional nga Agjencia e Punësimit që të përgatiten për tregun ndërkombëtar.
Shpetim Kalludra: Vitin e kaluar kemi pas 3150 persona që janë pajisë me certifikata, thjeshtë e kanë marrë një profesion. Këto certifikata ju shërbejnë jo vetëm në tregun vendor por edhe ndërkombëtar.
Deri në fund të vitit 2021 në Agjencinë e Punësimit si të papunë janë regjistruar 82 mijë qytetarë. /TCh/
