Derisa po bëhet e sigurt se zgjedhjet presidenciale dhe parlamentare do të mbahen më 8 maj – presim vetëm zyrtarizimin e datës, ndërkaq ende nuk dihet nëse LSDM, BDI dhe Aleanca për Shqiptarët do të marrin pjesë në zgjedhjet parlamentare me lista të përbashkëta. Partnerët e qeverisë Dimitar Kovaçevski dhe Ali Ahmeti janë afër marrëveshjes për të marrë pjesë së bashku në zgjedhjet presidenciale dhe parlamentare, Arben Taravari është kundër dhe të gjitha opsionet janë të hapura për të.
Jozyrtarisht, Kovaçevski përmes një bisede telefonike janë marr vesh me liderin e VMRO-DPMNE-së, Hristijan Mickoski, që zgjedhjet parlamentare të mbahen në raundin e dytë të zgjedhjeve presidenciale (8 maj), megjithëse partia opozitare e mohon këtë. Nga VMRO-DPMNE thonë se për ta është me rëndësi që Kovaçevski ka pranuar zgjedhje të përbashkëta, por thonë se nuk ka pasur bisedë telefonike, as takim të kryeministrit me kryetarin e LSDM-së, Kovaçevski, me liderin e tyre Mickoski, por presin një takim në të cilin do të zyrtarizohet data e zgjedhjeve.
Zëvendëskryeministri i parë Artan Grubi konfirmoi se ka vend që zgjedhjet parlamentare të zhvillohen së bashku me zgjedhjet presidenciale në fillim të majit.
“Tashmë është e sigurt, të gjitha partitë janë dakord që zgjedhjet të zhvillohen së bashku dhe të mos jenë të parakohshme sepse në maj ka hapësirë për të mbajtur zgjedhje të rregullta presidenciale dhe parlamentare dhe shpresoj që brenda pak ditësh të merret një vendim i përbashkët. Me disa parti po diskutohet për një paraqitje të përbashkët me LSDM-në, qoftë bashkë në Frontin Evropian apo veçmas me njëra-tjetrën, por ende nuk ka asgjë konkrete. Pritet që qeveria teknike në përputhje me marrëveshjen mes partive politike, të zbatohet në fund të janarit . Që do të thotë se ka kohë të mjaftueshme që zgjedhjet të zhvillohen së bashku”, ka thënë Grubi.
Zyrtarë të BDI-së kanë përsëritur disa herë se kryeministri i qeverisë teknike do të jetë nga BDI dhe se kjo është pjesë e marrëveshjes së qeverisë.
Kovaçevski para dy ditësh tha se LSDM-ja dhe BDI-ja kanë marrëveshje të qartë për koalicion, të publikuar në vitin 2020 dhe se gjëja kryesore që do t’i bashkojë partitë në zgjedhjet e ardhshme është realizimi i një koalicioni evropian që do të udhëheqë një front të gjerë. Ndonëse janë shumë afër një marrëveshjeje të tillë, BDI ende nuk ka vendosur nëse do të shkojnë me lista të përbashkëta.
Ndërsa zëvendëskryeministri Fatmir Bytyqi konfirmoi se janë duke biseduar me të gjitha partitë dhe se në periudhën e ardhshme do të bisedojnë edhe me opozitën për zgjedhjet e rregullta parlamentare dhe presidenciale. “Sigurisht që do të kemi një front evropian.
Fronti evropian është i hapur për të gjitha palët që mbështesin rrugën evropiane të shtetit, qoftë paraqitje e përbashkët apo në lista të përbashkëta është një marrëveshje. Nuk kemi parti, koalicion, apo marrëveshje ndërpartiake për lista të përbashkëta, por të gjitha opsionet janë të hapura”, tha Bytyqi.
Kryetari i Aleancës për Shqiptarët, Arben Taravari, tha se tashmë është mbajtur një takim me Kovaçevskin dhe Ahmetin për një paraqitje të përbashkët, por se Aleanca për momentin është kundër.
“Diskutuam opsionin për të shkuar me një listë zgjedhore. Por sinqerisht, mendoj se për momentin është pak problematike që ne si parti të jemi me BDI-në në të njëjtën listë, por nuk po e mbyllim çështjen. Do të bisedojmë me anëtarësinë dhe javën e ardhshme do të marrim një vendim”, tha Taravari.
Sipas asaj që flitet në koluaret partiake, problemi është se Aleanca për Shqiptarët është e ndarë dhe për këtë arsye është e pasigurt se si do të vendosin udhëheqësia partiake. Sipas një zyrtari të lartë partiak, do të jetë e rëndësishme se çfarë tregojnë sondazhet e brendshme partiake.
Sipas sondazheve të LSDM-së, vetëm një paraqitje e përbashkët do të sigurojë fitoren për partnerët e qeverisë (65 deputetë). Por këto sondazhe nuk mjaftojnë për të bindur Aleancën për Shqiptarët. Është e rëndësishme të shihet se çfarë do të tregojnë sondazhet se sa është gati elektorati maqedonas të votojë për një listë që përfshin Ahmetin, Taravarin, Selën… sa do të votojnë shqiptarët për Kovaçevskin, sepse koalicioni mes LSDM-së dhe Lëvizjes BESA nuk shkoi mirë në zgjedhjet e fundit.
Taravari konsideron se koalicioni me BDI-në është i padëshirueshëm, sepse BDI është kancer i shoqërisë. Për momentin, të gjitha opsionet janë në dispozicion – Aleanca shkon e vetme në zgjedhje, e dyta në koalicion me LSDM-në dhe BDI-në dhe e fundit është koalicion me Lidhjen Evropiane për Ndryshim, pra me opozitën e bashkuar shqiptare.
Kur bëhet fjalë për një paraqitje të përbashkët në zgjedhjet presidenciale, partitë në pushtet janë shumë më afër një marrëveshjeje. Nga BDI nuk kanë dilema se do të mbështesin një kandidat të propozuar nga LSDM-ja për shef të shtetit, ndërsa nga Aleanca për Shqiptarët thonë se mbështetja do të varet nga kandidati i ofruar.
Frontit Evropian të udhëhequr nga qeveria, është pothuajse e sigurt se do t’i bashkohen partitë e reja, ajo e Arianit Hoxhës, i shkëputur së fundmi nga Lëvizja BESA, si dhe partia e Skender Rexhepit. Nga ana tjetër, blloku opozitar shqiptar i udhëhequr nga Izet Mexhiti, Bilal Kasami dhe Afrim Gashi ende po e ftojnë Aleancën për Shqiptarët që t’i bashkohet për të garuar së bashku në zgjedhje kundër BDI-së.
Partia më e madhe opozitare VMRO-DPMNE nuk do të hyjë në koalicion parazgjedhor me një parti apo parti të shqiptarëve dhe do të marrë pjesë në zgjedhje me koalicionin që tashmë e udhëheq, si dhe do të propozojë kandidatin e saj për shef të shtetit. /koha/
