Nga Oda e Mjekëve në Maqedoninë e Veriut theksojnë se politikat shëndetësore duhet të mbështesin profesionistët shëndetësorë dhe të ofrojnë vazhdimisht informacion efektiv, transparent dhe objektiv për publikun dhe të luftojnë informacionin e rremë dhe mashtrues, shkruan NovaTV, përcjell Nistori.
“Vaksinat janë të sigurta dhe efektive, ato janë testuar tërësisht dhe janë provuar se parandalojnë sëmundje të rënda, duke shpëtuar miliona jetë çdo vit. Mjekët dhe profesionistët shëndetësorë duke krijuar një nivel edukimi shëndetësor për përfitimet e vaksinimit dhe duke ndarë fakte të bazuara në prova shkencore krijojnë një mjedis social pozitiv për të rritur mbulimin me vaksinim. Popullata e përgjithshme i konsideron mjekët si burimin më të rëndësishëm të informacionit të vaksinimit, i cili është vendimtar për pranimin e vaksinës.”, shtojnë nga ODA.
Ata vlerësojnë se, për shkak të pandemisë dhe lëvizjes së forcuar kundër vaksinimit, kemi një rënie të pranimit të vaksinimit të rregullt, veçanërisht me vaksinën MMR në vendin tonë, e cila kërkon përpjekje të përbashkëta për të rikthyer mbulimin e nevojshëm prej 95 për qind që konsiderohet një nivel i kënaqshëm të mbrojtjes kolektive. /Nistori/