Qeveria e Maqedonisë së Veriut e ka miratuar propozimin e Ministrisë së Financave për uljen e TVSH-së për energjinë elektrike për amvisëritë, por për periudhë të caktuar.
Kështu ka njoftuar në Facebook, ministri i Financave Fatmir Besimi. Siç shkruan ai, TVSH-ja për energjinë elektrike do të ulet nga 18% në 5%, për periudhën prej 1 korrik 2021 deri 30 qershor 2022. Kurse prej 1 korrikut 2022 deri 30 qershor 2023 do të jetë 10%, ndërsa prej 1 korrik 2023, sërish do të ngritet në 18%, përcjellë Nistori.
“Qëllimi është që t’iu ndihmohet amvisërive në periudhën transitore të liberalizimit të tregut të energjisë elektrike dhe të ruhet çmimi më i ulët i rrymës”, potencoi Besimi.
Ndërsa edhe Qeveria ka njoftuar se e ka miratuar tekstin për propozim-ndryshimet për Ligjin për Tatimin e Vlerës së Shtuar.
Pas miratimit nga Qeveria, këto propozim-ndryshime duhet të miratohen edhe në Kuvend./Nistori/
