Retorika parazgjedhore po nxehet gjithnjë e më shumë mes pushtetit dhe opozitës, të cilët akuzojnë njëri-tjetrin për përhapjen e lajmeve të rreme dhe fotomontazheve. Një foto e kandidates opozitare për presidente, Gordana Siljanovska-Davkova, së bashku me eurodeputetin bullgar Andrej Kovaçev, i njohur për shpërthimet e tij nacionaliste për marrëdhëniet maqedono-bullgare, shkaktoi një sërë grindjesh mes palëve se kush është më afër ndaj politikanëve bullgarë, duke u zvarritur kështu drejt izolimit dhe heqjes dorë nga e ardhmja evropiane.
LSDM-ja në pushtet që në mëngjes kritikoi fotografitë e Gordana Siljanovska Davkovës me eurodeputetin bullgar Andrej Kovaçev, të cilat, sipas tyre, konfirmojnë se bllokadat e së ardhmes së vendit janë qëllimi i tyre i përbashkët.
“Siljanovska është krenare për Kovaçevin, të cilit i është ndaluar hyrja në vend, i cili është një nga mohuesit më të mëdhenj të popullit, gjuhës, historisë dhe kulturës maqedonase. Ai shfrytëzon çdo rast për të thënë se Maqedonia është shtet artificial, se maqedonasit janë popull i krijuar artificialisht, se gjuha maqedonase është krijuar artificialisht. Kovaçev u sanksionua nga Parlamenti Evropian pasi ai përdori një përshëndetje naziste atje, Siljanovska qëndron me krenari pranë Kovaçevit, i cili pretendon se Maqedonia po falsifikon historinë”, reaguan nga LSDM.
Sipas Lidija Tasevskës, deputete e LSDM-së, ajo që po ofron DPMNE-ja dhe kandidatja e saj për presidente, Gordana Siljanovska, është kthimi në izolim dhe në të kaluarën e errët.
Por, nga VMRO-DPMNE pretendojnë se bëhet fjalë për një fotografi të vjetër. “LSD janë kapur të gjallë duke përhapur lajme të rreme, fotografia që kanë ndarë nga Gordana Siljanovska me Andrej Kovaçev është të paktën 5 vjeç dhe është krijuar gjatë një takimi të rastësishëm. Është nga koha kur Bojko Borisov ishte vëllai i liderit të LSD-së, Zoran Zaev, dhe ai u përshëndet me dashuri nga Stevo Pendarovski”, janë përgjigjur nga partia opozitare.
Ndryshe, Siljanovska, së bashku me një delegacion të VMRO-DPMNE-së, po qëndron për vizitë në Bukuresht, ku po mbahet Kongresi i Partisë Popullore Evropiane. Por partia thotë se nuk ka pasur asnjë takim me Andrej Kovaçev në kuadër të Kongresit të PPE. Zëdhënësi i VMRO-DPMNE-së, Naum Stoillkovski, akuzoi partinë në pushtet për “manipulim dhe përdorim të pandershëm të lajmeve të rreme”.
“LSD në rënie të lirë po përdor fotografi kur Kovaçev ishte ‘vëllai’ dhe ‘dashnor’ i tyre. Pyetja e vetme është nëse ky manipulim nuk është pjesë e marrëveshjes së LSD-së me Kovaçevin?”, thotë Stoilkovski. Përplasjet vijojnë pasi Ministria e Punëve të Jashtme bullgare iu përgjigj politikanëve dhe partive maqedonase që të mos përfshijnë marrëdhëniet dypalëshe mes dy vendeve në retorikën parazgjedhore. /Koha/
