Kampioni i shumëfishtë në Maqedoninë e Veriut dhe gjithashtu nënkampion në Ballkan në sportin e karatesë, Driton Halimi nga Tetova ka folur për Nistori në lidhje me sukseset që e ndjekin dhe sfidat e karatesë në vend. Halimi mban poashtu vendin e shtatë në Kupën e botës për karate.
Intervistën e përgatiti Sumeja H. Jakupi
Ai e ka zgjedhur sportin e karatesë për shkak të karakterit që e ka, sepse si fëmijë ka qenë shumë energjik. Fillimisht e ka nisur si pasion, por tani më ai merret edhe profesionalisht me karatenë.
Halimi thotë se për të qenë i suksesshëm në karate duhet dëshira, disiplina, trajnimet e rregullta. Se sa përkrahet ky sport në Maqedoninë e Veriut, ai për Nistori shprehet se të gjitha arritjet e deri tanishme i ka falë vetëfinancimit dhe nuk ka mbështetjen e ndonjë institucioni. Karateja është sport i tij i parë i parapëlqyer, por në përgjithësi i praktikon edhe sportet tjera luftarake.
Ëndrra e Halimit është që një ditë të jetë fitues i medaljes olimpike. Ai u drejtohet bashkëmoshatarëve të tij me fjalët: punoni fort, investoni dhe kini besimi te vetja. /Nistori/
