Kryesia e BDI-së ditë më parë ka shqyrtuar situatën aktuale politike në vend. Një nga pikat e bisedës ishte vizita në ShBA e kryeministrit Kovaçevski dhe ministrit të Jashtëm, Bujar Osmani dhe bisedimet që delegacioni shtetëror pati me krerët më të lartë amerikan, thuhet në kumtesën e BDI-së.
Nga BDI thonë se vizita u vlerësua unanimisht si jashtëzakonisht domethënëse dhe e suksesshme.
“Takimet në SHBA u realizuan në një kohë vendimtare kur po bëhen përpjekje për të ardhmen e vendit dhe po merren vendime të rëndësishme për qytetarët.
Në të gjitha takimet me krerë më të lartë të shtetit amerikan, u përfitua një mbështetje e plotë dhe e qartë për rrugën evropiane, të cilën vendi po e ndjek me vendosmëri.
Porositë pozitive nga Qeveria Amerikane janë rezultat i besimit në përkushtimin e Qeverisë së Maqedonisë së Veriut për parimet demokratike dhe integrimin evropian.
Vendi ynë njihet si faktor i stabilitetit rajonal dhe marrëdhëniet me Shtetet e Bashkuara janë në një nivel historikisht të lartë.
Përfaqësuesit e Shteteve të Bashkuara të Amerikës njohin dhe mbështesin përpjekjet për përmbushjen e kritereve të BE-së dhe përkushtimin për zbatimin e reformave jetike në të gjitha segmentet. Mesazhet e partnerëve tanë strategjikë janë edhe konfirmim i politikës dhe drejtimit korrekt që BDI e ndjek në mënyrë të vazhdueshme dhe pa kompromis”, thuhet në njoftimin e BDI-së.
Nga atje u bëjnë thirrje të gjitha partive politike dhe deputetëve që të bashkohen dhe të mbështesin të ardhmen evropiane të vendit.
