Shpresat dhe pritshmëritë mbi ndihmën urgjente, në raste urgjente, janë shumë të mëdha. Autoambulancat pritet të ofrojnë ndihmë të shpejtë, në kohë dhe efikase mirëpo shpesh ndodh që ato të pengohen nga trafiku i rënduar. Një përgjegjësi e madhe përveç ndaj shoferëve të papërgjegjshëm të cilët shpesh as nuk e kthejnë kokën kur e dëgjojnë sirenën e autoambulancës, shkon edhe për ata që i parkojnë automjetet në shtigjet dhe pikat e hyrjeve të ndërtesave në lagjet me popullsi të dendur, ku shpesh pamundësojnë ndërhyrjet emergjente.
E tillë është pasqyra në Çair, Zhelezarë, Aerodrom, e shumë lagje të Shkupit, ku banorët pa kujdes i parkojnë automjetet – në dëm të tyre. Pikërisht këtu fillojnë problemet reale, nga të cilat mund të varet jeta e njeriut. Nëse ndonjë prej banorëve atje ka nevojë për ambulancë, duke bllokuar shtigjet, ekipet e shpëtimit nuk do të kenë asnjë mënyrë për të hyrë në ndërtesë për të ndihmuar. “Ky është një problem shumë i madh, për të cilin kemi folur shumë por nuk ka pasur asnjëherë ndonjë përmirësim të vetëdijes. Madje edhe kam debatuar me personat që parkoheshin keq, por më kot. As unë nuk mund të jem në detyrë t’u shpjegoj, as njerëzit janë të vetëdijshëm dhe të edukuar për të ditur se ku mund dhe nuk mund të parkojnë. Këtu kemi një treg të vogël ku blejnë shumë njerëz që vijnë me vetura, kështu që është një problem i vërtetë për ne”, thotë Nazifi, banor i Çairit.
Të gjitha këto probleme prej kohësh janë regjistruar nga ekipet e ambulancës, nga ku thonë se e gjithë kjo është një problem serioz për ta. “Parkimi në hyrje të tilla të qasëshme të ndërtesave duhet të trajtohet duke telefonuar një shërbim merimangë. Duhet patrulluar policia, e cila do të zbulojë situata të tilla dhe do të ndëshkojë drejtuesit e pakujdesshëm. Duhet të zbulohen problemet në terren”, ka thënë Milica Bubalo, shefe e shërbimit emergjent mjekësor në Shtëpinë e Shëndetit Shkup.
Bubalo gjithashtu thotë se më së shumti ndihmojnë qytetarët, por kur të tria korsitë janë të bllokuara edhe ata nuk bëjnë dot mrekulli. “Këtu do të thosha se faji është i qytetit, duhet marrë një telekomandë për të kontrolluar semaforët, që do të sigurojë një valë të gjelbër për ambulancën. Në këtë mënyrë automjetet përballë autoambulancës do të fillojnë të lëvizin dhe do të lirohet rruga për automjetin tonë. Me një telekomandë të tillë, ambulanca do të bëjë dallgë të gjelbra vetë teksa i afrohet disa semaforëve. Në atë mënyrë është zgjidhur edhe ky problem në komunikacion në botë”, thekson ajo.
Sipas saj, autoambulanca nuk ka të drejtë të kalojë në semafor të kuq. “Ligjërisht nuk kemi të drejtë të futemi në semafor të kuq, edhe pse shpesh e bëjmë. Për shkak të dritës rrotulluese, na lënë të kalojmë, përndryshe ne shpesh qëndrojmë dhe presim që drita e gjelbër të ndizet. Kur kalojmë ashtu rrezikojmë jetën tonë dhe të përdoruesve të tjerë të rrugës. Nëse do të kishim një valë të gjelbër, nuk do të duhej të rrezikonim”, thekson ajo. /koha/
