Ali Ahmeti nuk është i kapur nga askush. Sekretari i Përgjithshëm i BDI-së Faton Ahmeti në Programin 200 në Alsat iu kundërpërgjigj akuzave të kreu të Lëvizjes Besa, Bilall Kasami i cili tha se Ali Ahmeti është i kapur nga Artan Grubi prandaj s’mund ta shkarkojë atë, përcjell Nistori.
“Ali Ahmeti nuk është i kapur nga askush. Ali Ahmeti është figura kyçe, qendrore e Bashkimit Demokratik për Integrim. BDI është vetë Ali Ahmeti. Në këtë kontekst sa i përket mbrojtjes që ua bën zv/kryeministrave, çdo herë e ka pasur qasjen e njëjtë ndaj ekzekutivit, duke pasur parasysh se ekzekutivi përherë ballafaqohet me punë që duhet t’i realizojnë në qeveri me kërkesat që vijnë nga baza dhe me vetë faktin që ushtron një detyrë në ekzekutiv dikujt i prishet qejfi, dikujt i bëhet qejfi”, deklaroi Faton Ahmeti, Sekretar i Përgjithshëm i BDI-së, në Programin 200 në Alsat.
Ahmeti shtoi se situata aktuale nuk mund të krahasohet me atë të vitit 2016 kur kreu i BDI-së Ali Ahmeti mori vendim që t’i zëvendësojë të gjithë ministrat e BDI-së.
“Në të gjitha rastet Ali Ahmeti ka qenë ai i cili ka qenë krah ekzekutivit, ka qenë mbrojtës, ka qenë avokat i z. Musa Xhaferi për mbi 11 ose 12 vite. Të njëjtën e ka bërë edhe zv/kryeministërin, të ndjerin Abdylaqim Ademi, dhe gjithë zv/kryeministrat e deritanishëm. Ndërsa situata e 2016-ës ka qenë komplet në situatë e ndryshme nga kjo e sotshmja, ishte një situatë që rezultoi pas përgjimeve të paligjshme të cilat u lëshuan aso kohe dhe e dimë se si ishte epilogu, si ishte vajtja e procesit në atë rast. Prandaj nuk mund të bëjmë një paralele mes asaj situate të atëhershme dhe situatës së sotshme”, shtoi Ahmeti.
Ahmeti: BDI s’e pranon “modelin kroat”, Marrëveshja e Ohrit u fitua me luftë
Ahmeti, tha se partia që përfaqëson ai, nuk pranon të bisedojë për “modelin kroat” që e propozon VMRO-ja për ndryshimet kushtetuese. Megjithatë, Ahmeti, në Programin200, tha se është mirë që VMRO-DPMNE-ja ka shprehur gatishmëri të pranojë të bisedojë për ndryshimet kushtetuese.
“Më i rëndësishëm mendoj se ka qenë momenti që VMRO-ja shprehet e gatshme të bisedojë për ndryshimet. Ne nuk pranojmë që të diskutohet për modelin kroat. Por me vetë faktin që (VMRO) ka shprehur gatishmëri për tu bërë pjesë e procesit pastaj në tryezë të bisedimeve do të shtroheshin modelet dhe mundësitë. Edhe VMRO-ja është e vetëdijshme për realitetin e shtetit”, tha Ahmeti në Programin 200.
Thoni që Marrëveshja e Ohrit që u arrit me luftë, nuk mund të zhbëhet me vota në Kuvend?
“Aspak. Marrëveshja e Ohrit, ia ka garantuar shtetit sigurinë, funksionimin dhe është marrëveshje me garancë të plotë të BE-së dhe SHBA-ve. Dhe një marrëveshje që është arritur me luftë, me gjak, s’mund të ndryshohet në tavolinë”, u shpreh Ahmeti në Programin 200.
